टीम मंगळवेढा टाईम्स ।
मंगळवेढा-पंढरपूर विधानसभा पोटनिवडणुकीत समाधान आवताडे विजयी व्हावेत; म्हणून मंगळवेढा तालुक्यातील नंदेश्वर येथील दत्ता साबणे या कार्यकर्त्याने चप्पल घालणे थांबवले होते. जोपर्यंत समाधान आवताडे हे आमदार होत नाहीत; तोपर्यंत मी चप्पल घालणार नाही, अशी प्रतिज्ञा दत्ता साबणे यांनी घेतली होती.
त्यांच्या या प्रतिज्ञेला यश आले आणि समाधान आवताडे हे आमदार झाले. आपल्यासाठी नवस बोलणाऱ्या कार्यकर्त्याचा नवनिर्वाचित आमदार समाधान आवताडे यांनी थेट त्याच्या घरी जाऊन त्याच्या पायात चप्पल घालून त्याचा पेहराव देऊन सत्कार केला. सत्काराप्रसंगी आमदार आवताडेंच्या डोळ्यात अश्रू दाटून आले.
पंढरपूर विधानसभा पोटनिवडणूक जाहीर झाल्यानंतर समाधान आवताडे हे निवडणूक लढविण्याच्या दृष्टीने चाचपणी करत होते.त्या वेळी नंदेश्वर येथील त्यांचे समर्थक कार्यकर्ते दत्तात्रेय साबणे यांनी ‘जोपर्यंत समाधान आवताडे आमदार म्हणून विजयी होत नाहीत, तोपर्यंत पायात चप्पल घालणार नाही’ अशी प्रतिज्ञा केली.
त्यांच्या या अनोख्या प्रतिज्ञेमुळे या परिसरामध्ये कुतुहलाचा विषय झाला होता. आमदार प्रशांत परिचारक व दामाजी कारखान्याचे अध्यक्ष समाधान आवताडे या दोन्ही गटाचे मनोमिलन झाल्यामुळे समाधान आवताडे यांचा विजय होण्याचा मार्ग सोपा झाला होता.
त्यातूनच 3 हजार 733 मतांनी आवताडे हे विजयी झाले. नवनिर्वाचित आमदार आवताडे यांनी आज नंदेश्वर येथील दत्तात्रय साबणे यांच्या घरी जाऊन त्यांच्या पायात नवीन चप्पल घालत व त्यांचा सत्कार केला.
यावेळी संत दामाजी ट्रस्ट समितीचे अध्यक्ष विष्णुपंत आवताडे, जिल्हा फेडरेशनचे सरोजभाई काझी, माजी जि.प.सदस्य नामदेव जानकर, माजी ग्रामपंचायत सदस्य अशोक चौंडे,भारत गरंडे, आकाश डांगे, रुक्मिणीताई दोलतोडे, बापू गरंडे, पिंटू बंडगर, तुकाराम मोटे,बबलू सुतार व इतर ग्रामस्थ उपस्थित होते
भूमिपुत्र आमदार व्हावा म्हणून नवस केला
मंगळवेढा तालुक्यातील व्यक्ती पंढरपूर-मंगळवेढा मतदारसंघाचा आमदार व्हावा, अशी गेल्या अनेक वर्षांपासूनची इच्छा होती. त्यातच पंढरपूरच्या पोटनिवडणुकीत समाधान अवताडे यांना भाजपने उमेदवारी दिली.
त्यामुळे कार्यकर्ते त्यांच्या विजयासाठी जिवाचे रान करत असताना आपण यामध्ये काहीतरी योगदान द्यावे. म्हणून जोपर्यंत ते आमदार होत नाही; तोपर्यंत चप्पल न घालण्याची प्रतिज्ञा केली होती. समाधान आवताडे हे आमदार म्हणून विजयी झाले आणि माझी ती प्रतिज्ञा पूर्ण झाली. त्याचे समाधान वाटते, अशी भावना कार्यकर्ते दत्तात्रय साबणे यांनी व्यक्त केली.
दत्ता साबणे यांच्यासारखे कार्यकर्ते हीच राजकीय मंडळीची ताकद : आ. समाधान आवताडे
राजकारण आणि समाजकारण या सेवाव्रत विश्वात वावर अथवा कार्य करत असताना अनेक लोकांचा प्रत्यक्ष – अप्रत्यक्ष संबंध येत असतो. पुढे जाऊन हीच संबंधरुपी प्रेमाची वीण इतकी घट्ट होते की, आपल्या नेत्याच्या राजकीय समृद्धीसाठी व त्यांच्यावरील प्रेमापोटी कार्यकर्ता हा काय करेल याचा नेम राहत नाही.
आणि याचाच प्रत्यय मंगळवेढा तालुक्यात नुकताच पहावयास मिळाला त्याचे झाले असे की, दामाजी सहकारी साखर कारखान्याचे चेअरमन समाधान आवताडे जोपर्यंत आमदार होत नाहीत तोपर्यंत पायात चप्पल न घालण्याची भीष्मप्रतिज्ञा करणारे नंदेश्वर गावचे सुपुत्र दत्तात्रय साबणे यांचे पण आज फळाला आले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज