बुधवारी झालेल्या मुसळधार पावसामुळे उजनीतून भीमा नदीच्या पात्रात मोठ्या प्रमाणावर विसर्ग सोडण्यात आला आहे. तर आज उजनी धरणातून सोडला जाणारा सकाळी 7 वाजता कमी करण्यात आला असून तो 1 लाख 50 हजार आहे. तर वीरचा विसर्ग सकाळी 5 वाजता 53 हजार 847 क्यूसेक्स करण्यात आला आहे.
मात्र रात्री सोडलेल्या पाण्याचा परिणाम काही तास दिसणार आहे. भीमाकाठी पूरस्थिती असणार आहे. पंढरपूर – मंगळवेढा रस्त्यावरील गोपाळपूर पुलावर पाणी आले आहे.
त्यामुळे भीमा नदीची पाणी वेगाने वाढते आहे. दरम्यान , पुणे जिल्ह्यातून येणाऱ्या पाण्यात एकदम वाढ झाली असून बंडगार्डन येथे 26 हजार 21 तर दौंड येथे 11 हजार 80 क्यूसेक्स ने पाणी उजनी धरणात येत आहे.
नदी काठच्या लोकांनी सुरक्षित स्थळी जाणे गरजेचे आहे. प्रशासनाने तसे आवाहन केले आहे. काल ( बुधवारी ) रात्री साडे 11 वाजता वाजता भीमा नदीत उजनीतून 2 लाख 50 हजार क्यूसेक्स इतका विसर्ग आला होता आणि वीर धरणातून 35 हजार क्यूसेक्स होता. सकाळी 7 वाजता 1 लाख 50 हजार क्यूसेक्स करण्यात आला आहे.
उजनी आणि विरमधून सोडलेला विसर्ग आज दुपारी येथे येण्याची शक्यता आहे. सकाळी संगम – नीरा नरसिंहपूर येथे 2 लाख 50 हजार क्यूसेक्सहून अधिक पाणी होते. त्यात स्थानिक पाण्याची भर पडून दुपारी येथे 3 लाख 25 हजार क्यूसेक्सहुन अधिक पाणी पातळी असण्याची शक्यता आहे. त्या अनुषंगाने जिल्हा प्रशासनाने नदी काठच्या नागरिकांना सावधानतेचा ईशारा दिला आहे.
आज दिवसभर पाऊस चालू राहील असे हवामान खात्याने सांगितले असल्याने भीमा नदीतील विसर्ग आणखी वाढण्याची शक्यता आहे. त्यामुळे भीमा नदीला महापूर निश्चित असून नदी काठच्या गावातील नागरिकांनी सुरक्षित ठिकाणी आसरा घेणे आवश्यक आहे.
पंढरपूर शहरातील व्यास नारायण झोपडपट्टी , अंबाबाई पटांगण , आंबेडकर नगर झोपडपट्टी , गुरुदेव नगर या भागातील लोकांना सुरक्षित स्थळी स्थलांतरित करण्यात आले आहे. या लोकांना लोकमान्य विद्यालय , केंद्रे महाराज मठ , तनपुरे महाराज मठ येथे स्थलांतरित करण्यात आले आहे.
भीमा नदीच्या काठी असलेली सोलापूर जिल्ह्यातील गावे व शहरांना जिल्हा प्रशासनाने सावधानतेचा इशारा दिला आहे. धरणातून मोठ्या प्रमाणात पाण्याचा विसर्ग होत असल्याने नदीपात्रातील पाण्याची पातळी वाढून आजूबाजूच्या वस्त्यांमध्ये पसरण्याचा धोका आहे. त्यामुळे नागरिकांनी योग्य ती दक्षता घ्यावी, असे आवाहन करण्यात आले आहे.
शनिवारपर्यंत पावसाचा जोर कायम राहण्याची शक्यता असल्याने धरणातून पाण्याचा विसर्ग आणखी वाढवावा लागण्याची शक्यता वर्तविण्यात येत आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
