पशुसंवर्धन अधिकाऱ्याच्या नाकर्ते पणामुळे लंपी आजाराने हजारो जनावरे त्रस्त असून पशुसंवर्धन विभाग मात्र बघ्याच्या भूमिकेत असल्याचे दिसून येत आहे.
गुरुवार दि.१९ नोव्हेंबर रोजी प्रकाश भुसनर डिकसळ ता.सांगोला यांची सव्वा लाख रुपये किंमतीची जर्सी गाय दगावली असून शेतकऱ्यांचे लाख मोलाचे पशुधन हातचे गेल्याने याला जबाबदार कोण ? असा प्रश्न पशुपालक शेतकऱ्यातून विचारला जात आहे.
गेल्या काही महिन्यापासून जिल्ह्यात व तालुक्यात लंपी आजाराने जनावरे त्रस्त असल्याने पशुपालक शेतकरी हवालदिल आहे . प्रशासनाकडून खबरदारी म्हणून जनावरांचे आठवडा बाजारही बंद आहेत .
जिल्हा परिषदेचे पशुसंवर्धन सभापतीच्या मतदारसंघात लंपी आजाराची मोठ्या प्रमाणात लागण झाल्याचे दिसून येत आहे . डिकसळ ता.सांगोला या गावांमध्ये शेकडो जनावरांना लंपी आजाराची लागण झाल्यने पशुपालक शेतकरी चिंतेत आहेत. या भागातील पशुवैद्यकीय अधिकारी अनेक दिवसापासून गायब असल्याचे पशुपालकांकडून सांगण्यात आले.
एवढ्या गंभीर आजारात पशुवैद्यकीय डॉक्टर गायब असल्याने शेतकऱ्यानी कोणाकडे दाद मागायची ? असा प्रश्न निर्माण झाला आहे. प्रकाश भुसनर डिकसळ यांची जर्सी गाय गेल्या एक महिन्यापासून लंपी आजाराने त्रस्त होती.
भूसनर यांनी या गायीच्या उपचारासाठी चाळीस हजार रुपये खर्च केले. परंतु आज या जर्सी गायीने अखेरचा श्वास घेतला. पशुवैद्यकीय अधिकाऱ्यांच्या नाकर्तेपणामुळे शेतकऱ्यांचे लाखमोलाचे पशुधन धोक्यात आले आहे.
सांगोला तालुक्यात सुमारे १ लाख ७४ हजार लहान – मोठी जनावरे आहेत. तालुक्यातील हजारो जनावरांना लंपीची लागण झाली आहे. शासनाकडून पशुसंवर्धन विभागाकडे १२०० लसी उपलब्ध झाल्या होत्या. मात्र पाच हजार जनावरांचे लसीकरण केल्याचा दावा पशुसंवर्धन विभागाने केला आहे.
उर्वरित लाखो जनावरांचे लसीकरण कधी होणार ? असा प्रश्न शेतकरी व पशुपालक शेतकरी वर्गातून विचारला जात आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज