टीम मंगळवेढा टाईम्स ।
येत्या विधानसभा निवडणुकीत आमचे किती उमेदवार निवडून आणू शकतो व किती जणांना पाडू शकतो, याचा फैसला २० ऑगस्टला होईल,’ अशी माहिती मराठा आरक्षण योद्धा मनोज जरांगे-पाटील यांनी येथे पत्रकार परिषदेत दिली.
‘मराठ्यांना कोणी हिणवले तर त्यांना सोडणार नाही,’ असा इशारा देत मराठ्यांची ताकद काय असते, हे विधानसभा निवडणुकीपूर्वी कोल्हापुरात येऊन दाखवतो, असेही ते म्हणाले.
जरांगे-पाटील म्हणाले, ‘मला व समाजाला राजकारणात जायचे नाही. केवळ आमच्या मागण्यांची पूर्तता करा, एवढेच आमचे म्हणणे आहे.
जर त्यांची पूर्तता झाली नाही तर आमच्याकडे कोणता पर्याय आहे? त्याचा निर्णय २९ ऑगस्टला अंतरवाली सराटी येथे होणार आहे. त्यासाठी दीड महिन्यांपासून राज्यभरात चाचपणी सुरू आहे.
आमची तयारी सुरू असून २० ऑगस्टला राज्यात आम्ही किती उमेदवारांना निवडून आणू शकतो व पाडू शकतो, हे कळेल.
मराठा आरक्षणासाठी सहकार्य करतील, त्यांना मदतीची भूमिका असेल. गरीब मराठे पूर्ण ताकदीने एकवटले आहेत. त्यांना न्याय देण्यासाठी आंदोलन सुरू आहे. आरक्षणाच्या लढ्यात केवळ दहा मराठे असले तरी मागे हटणार नाही. सरकारच्या छाताडावर बसून ओबीसीतूनच आरक्षण घेणार आहे.’
ते पुढे म्हणाले, ‘मला मराठा जात व मराठा समाजातील मुलांना मोठे करायचे आहे. गरीब मराठ्यांनी कोणाकडे जायचे नाही, हे ठरवले आहे. छगन भुजबळ ६० टक्के ओबीसी असल्याचे सांगत आहेत. त्यात मराठ्यांना बसवणार आहे.
ओबीसीतील मोठ्या जातींनी त्यांच्या गरीब जातींचा किती फायदा करून दिला, हे तपासून पाहावे. त्यामुळे आमचा त्यांना धोका असण्याचे कारण नाही. ओबीसीतून कोणाला काढायची व हाकलायची गरज नाही. मराठा समाज पूर्वीपासूनच ओबीसीत आहे.’
माझ्यामागे गरीब मराठा समाज
‘मी याचा माणूस आहे, मी त्याचा माणूस आहे, मला कोण पैसे पुरवतो’, अशा तऱ्हेचे आरोप माझ्यावर होत आहेत. मात्र, एखाद्याने पाठबळ दिले तर तो बस म्हटले की बसावे लागते, उठ म्हटले की उठावे लागते.
माझ्यामागे गरीब मराठा समाज आहे. विरोधी व सत्ताधारी पक्षातील लोक तर मी कशात सापडतो का, याच्या शोधात आहेत. त्यांच्या हाती काहीच लागणार नाही,’ असे जरांगे-पाटील यांनी सांगितले.
‘तो’ नेता काहीही बरळतो…
”कोल्हापूरचा एक नेता काहीही बरळतो. तो पुण्यातून निवडून येतो. तो रक्ताच्या नात्यातील निर्णय २०१७ ला झाल्याचे सांगतो. मग अधिसूचना आता का काढली? लोकांना किती वेड्यात काढणार?’, असा टोला जरांगे-पाटील यांनी उच्च व तंत्रशिक्षणमंत्री चंद्रकांत पाटील यांचे नाव न घेता लगावला. सग्यासोयऱ्यांची अंमलबजावणी करायची आहे म्हणून सरकार तणावात असल्याचेही ते म्हणाले.
…तर मुंबईत येऊन मराठा समाज जाब विचारेल
‘फडणवीस यांनी नारायण राणे व दरेकरांना माझ्यामागे लावले आहे. दरेकरांनी मराठा समन्वयक व क्रांती मोर्चे फोडले. मला उघडे पाडण्यासाठी व एकटे पाडण्यासाठी षड्यंत्र रचण्यात आले आहे,’ असे सांगत मराठ्यांनी जाब विचारायचे ठरवले तर मुंबईत येऊन त्यांची गळपट धरून जाब विचारेल, एवढी क्षमता मराठ्यांत आहे, असे मनसेप्रमुख राज ठाकरे यांच्या संदर्भाने विचारलेल्या प्रश्नावर जरांगे-पाटील म्हणाले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
