मंगळवेढा टाईम्स न्युज नेटवर्किंग ।
आगामी आषाढी वारी सोहळा ‘स्मार्ट वारी, सुरक्षित वारी’ या संकल्पनेतून निर्विघ्न आणि शांततेत पार पाडण्यासाठी सोलापूर ग्रामीण पोलिसांनी कंबर कसली आहे.
सोलापूर ग्रामीणचे पोलिस अधीक्षक अतुल कुलकर्णी यांच्या संकल्पनेतून आणि मार्गदर्शनाखाली सोलापूर जिल्ह्यातील तब्बल ८१ सराईत गुन्हेगारांची पोलिस मुख्यालयात परेड घेण्यात आली.
वारीच्या काळात सामाजिक सुव्यवस्था भंग करणाऱ्यांची गय केली जाणार नाही, असा सज्जड दम यावेळी पोलिस अधीक्षकांनी दिला.
पोलिस मुख्यालय, सोलापूर ग्रामीण येथे आयोजित या परेडसाठी जिल्ह्यातील हिस्ट्रीशीटर, गँग हिस्ट्रीशीटर, रेकॉर्डवरील गुंड आणि विविध गुन्हे दाखल असलेल्या ८१ आरोपींना बोलावण्यात आले होते.
आगामी सण-उत्सव आणि आषाढी वारीच्या काळात कोणत्याही प्रकारची बेकायदेशीर कृती करून कायदा व सुव्यवस्थेचा प्रश्न निर्माण करू नये, अशा कडक सूचना त्यांना देण्यात आल्या. याचवेळी सर्व उपस्थित गुन्हेगारांकडून आगामी काळात शांतता व सुव्यवस्था राखण्याबाबत चांगल्या वर्तणुकीचे हमीपत्र (बॉण्ड) लिहून घेण्यात आले आहे.
या हमीपत्राचा किंवा अटींचा भंग केल्यास थेट कडक कायदेशीर कारवाई करण्यात येईल, असा इशारा पोलीस अधीक्षक अतुल कुलकर्णी यांनी दिला आहे. या सर्व गुन्हेगारांवर पोलिसांचा २४ तास वॉच असणार आहे.
पोलिसांच्या या ‘स्मार्ट’ आणि ‘कडक’ रणनीतीमुळे यंदाची आषाढी वारी भाविकांसाठी अधिक सुरक्षित आणि सुखकर होईल, असा विश्वास व्यक्त केला जात आहे.
सुधारण्याची सुवर्णसंधी
पात्रतेनुसार रोजगारः जे गुन्हेगार गुन्हेगारी सोडून सन्मानाने जगू इच्छितात, त्यांची पात्रता आणि इच्छा पाहून त्यांना योग्य रोजगार मिळवून देणार असल्याचे पोलीस प्रशासनातर्फे सांगण्यात आले.
शेतकऱ्यांना मोफत सल्लाः ज्या गुन्हेगारांकडे स्वतःची शेती आहे, त्यांना शेती व्यवसायातून चांगला नफा कमावता यावा यासाठी तज्ज्ञांमार्फत योग्य आणि मोफत कृषी मार्गदर्शन देण्याचे आश्वासनही पोलीस अधीक्षकांनी दिले.
हमीपत्राचा भंग केल्यास कडक कायदेशीर कार्यवाही
आषाढी वारीच्या पार्श्वभूमीवर सराईत गुन्हेगारांकडून आगामी काळात शांतता राखण्याबाबत चांगल्या वर्तणुकीचे हमीपत्र लिहून घेण्यात आले आहे. या हमीपत्राचा कोणी भंग केल्यास त्यांच्यावर कडक कायदेशीर कार्यवाही करण्यात येईल.-अतुल कुलकर्णी, पोलिस अधीक्षक, सोलापूर ग्रामीण
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
