मंगळवेढा टाईम्स न्युज । सांगोला
मोबाईलचे व्यसन आणि आलिशान गाडी घेण्याच्या हट्टापायी एका २० वर्षीय तरुणाने राहत्या घरी गळफास घेऊन आपली जीवनयात्रा संपवल्याची धक्कादायक घटना घेरडी (ता. सांगोला) येथे मंगळवारी सकाळी साडेअकरा वाजेच्या सुमारास घडली.
प्रयांश पोपट कोकरे (वय २०) असे आत्महत्या केलेल्या तरुणाचे नाव आहे. या घटनेमुळे घेरडी परिसरात प्रचंड खळबळ उडाली असून कोकरे कुटुंबावर दुःखाचा डोंगर कोसळला आहे.
याप्रकरणी मृत तरुणाचे वडील पोपट सुखदेव कोकरे यांनी सांगोला पोलीस ठाण्यात खबर दिली असून, पोलिसांनी अकस्मात मृत्यूची नोंद केली आहे.
दिवसरात्र मोबाईलचे व्यसन अन् सततचा हट्ट
मिळालेल्या माहितीनुसार, मृत प्रयांश हा गेल्या काही काळापासून कमालीचा मोबाईलच्या आहारी गेला होता. तो दिवसरात्र मोबाईल पाहण्यातच व्यस्त असायचा.
मोबाईलच्या या अतिवापरामुळे त्याच्या स्वभावात चिडचिडेपणा आला होता आणि तो घरच्यांकडे सतत वेगवेगळ्या गोष्टींसाठी हट्ट धरायचा. त्याच्या या सततच्या हट्टामुळे कोकरे कुटुंबातील सर्व सदस्य प्रचंड वैतागले होते.
आलिशान गाडीसाठी १५ दिवसांपासून वाद
गेल्या १५ दिवसांपासून प्रयांशने घरच्यांकडे ‘आलिशान गाडी’ घेऊन देण्यासाठी तगादा लावला होता. मला महागडी गाडी पाहिजेच, या हट्टाला तो पेटला होता. यावरून सोमवार रात्री उशिरापर्यंत त्याने आई-वडिलांसोबत जोरदार वाद घातला होता.
मंगळवारी सकाळी पुन्हा याच कारणावरून घरात वाद झाला. वडिलांनी त्याची समजूत काढण्याचा खूप प्रयत्न केला, परिस्थिती समजावून सांगितली; परंतु प्रयांश ऐकण्याच्या मनस्थितीत नव्हता.
…अन् रागाच्या भरात उचलले टोकाचे पाऊल
वडिलांनी समजावून सांगूनही रागाच्या भरात असलेल्या प्रयांशने मंगळवारी सकाळी साडेअकरा वाजेच्या सुमारास घरातील किचनमध्ये जाऊन गळफास घेतला.
हा प्रकार लक्षात येताच वडील पोपट कोकरे यांनी त्याला तातडीने खाली उतरवून उपचारासाठी ग्रामीण रुग्णालयात दाखल केले. मात्र, डॉक्टरांनी तपासणीपूर्वीच त्याचा मृत्यू झाल्याचे घोषित केले.
पालकांनो सावधान! ‘स्क्रीन टाईम’ ठरतोय जीवघेणा
आजकालच्या तरुणाईमध्ये मोबाईलचे वाढते व्यसन आणि आभासी जगाच्या प्रभावामुळे हट्टीपणा वाढत चालल्याचे या घटनेतून पुन्हा एकदा समोर आले आहे. क्षुल्लक कारणावरून पोटच्या मुलाने असे टोकाचे पाऊल उचलल्याने संपूर्ण सांगोला तालुक्यात हळहळ व्यक्त होत आहे. पोलीस या प्रकरणाचा पुढील तपास करत आहेत.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
