टीम मंगळवेढा टाईम्स ।
राष्ट्रवादीचे सर्वेसर्वा शरद पवार हे आजही देशातील सर्वच तरुण आणि बुजुर्ग राजकारण्यांसाठी आदर्श राजकारणी आहेत.
त्यांच्या कार्यातून, अफाट बुद्धिमत्ता, अभ्यास आणि लोकसंपर्कातून शरद पवारांनी हे वेळोवेळी सिद्धही केलं आहे. मागच्यावेळी वयाच्या 80व्या वर्षीही शरद पवारांनी भरपावसात सभा घेतली अन् साताऱ्यातील लोकसभा निवडणुकीचा गेम पालटला.
पवारांची ही सभा संपूर्ण देशात चर्चेचा विषय ठरली. आताही पवारांच्या कर्तव्य निष्ठतेचं हे रुप पाहायला मिळालं आहे. रुग्णालयात न्यूमोनियावर उपचार घेत असताना त्यांनी मध्येच डिस्चार्ज घेतला असून थेट पक्षाच्या मेळाव्यासाठी शिर्डीत दाखल झाले आहेत.
वयाच्या 81व्या वर्षीही आजाराची पर्वा न करता पवारांनी दाखवलेल्या या उत्साहाची एकच चर्चा सुरू झाली आहे.
राष्ट्रवादी काँग्रेसचे सर्वेसर्वा शरद पवार हे मुंबईतील ब्रीच कॅंड रुग्णालयातून थेट शिर्डीत पक्षाच्या अधिवेशनाच्या व्यासपीठावर दाखल झाले आहेत.
शिर्डीतील राष्ट्रवादी काँग्रेस पक्षाच्या अधिवेशनात पदाधिकारी आणि कार्यकर्त्यांना ते मार्गदर्शन करणार आहेत.
ज्येष्ठ नेते पवार हे राष्ट्रवादी काँग्रेसच्या अधिवेशनाच्या तोंडावर आजार पडल्याने त्यांना मुंबईतील ब्रीच कॅंडी रुग्णालयात दाखल करण्यात आले होते.
ते शिबिराला येणार की नाही, याची चर्चा रंगली होती. मात्र, सर्वांचे अंदाज खोटे ठरवत पवार यांनी पक्षाच्या शिबिराच्या पहिल्याच दिवशी ऑनलाईन पद्धतीने हजेरी लावली हेाती.त्यांच्या ऑनलाईन उपस्थितीमुळे कार्यकर्त्यांमध्ये उत्साह संचारला होता.
मुख्यमंत्री एकनाथ शिंदे यांनी ब्रीच कॅंडी रुग्णालयात जाऊन पवार यांची भेट घेतली होती. त्यावेळी त्यांनीच शरद पवार हे आज शिर्डीत शिबिराला येऊन मार्गदर्शन करणार आहेत, असे सांगितले होते.
त्यानुसार पवार आज शिर्डीतील व्यासपीठावर विराजमान झाले आहेत. पवार हे मुंबईहून थेट हेलिकॉप्टरने शिर्डीत दाखल झाले. विमानतळावरून ते शिबिरात थेट व्यासपीठावर दाखल झाले आहेत.
शरद पवार हे थोडयाच वेळात मार्गदर्शन करणार आहेत. ते पदाधिकारी आणि कार्यकर्त्यांना कशा प्रकारचे टॉनिक देतात, याकडे सर्वांचे लक्ष लागले आहे.(स्रोत:सरकारनामा)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज