टीम मंगळवेढा टाईम्स (प्रतिनिधी):
आई-वडिलांचे छत्र हरपलेली मुले, पोटाची खळगी भरण्यासाठी वणवण भटकणाऱ्या ऊसतोड व वीटभट्टी कामगारांची लेकरं, रस्त्यांवर राबणाऱ्या मजुरांची उपेक्षित मुलं आणि विविध संकटांनी होरपळलेली बालके… या साऱ्यांच्या अंधकारमय जीवनात आशेचा नवा किरण ठरत आहे
मंगळवेढा तालुक्यातील निंबोणी येथील ‘सहारा बाल सेवा आश्रम’. श्रीनाथ बहुद्देशीय बाल विकास सामाजिक संस्थेच्या वतीने चालवले जाणारे हे आश्रम आज खऱ्या अर्थाने अनाथ, निराधार आणि वंचित मुलांचे हक्काचे माहेरघर बनले आहे.
अनुदानाविना धडपड, केवळ संवेदनशीलतेची ताकद
आज अनेक संस्था शासकीय अनुदानाच्या जोरावर चालतात; मात्र निंबोणी येथील सहारा बाल सेवा आश्रमाला अद्याप शासनाचे कोणतेही अनुदान अथवा शासकीय लाभ मिळालेला नाही. आश्रम पूर्णतः विनाअनुदानित तत्त्वावर सुरू आहे. तरीही संस्थेचे संस्थापक अध्यक्ष, त्यांचे सहकारी आणि बाल सेवा प्रतिनिधी पदरमोड करून व समाजातील दानशूर व्यक्तींच्या लोकवर्गणीतून या बालकांचे संगोपन, अन्न, वस्त्र आणि शिक्षणाची सोय अखंडपणे करत आहेत.
उपेक्षितांच्या शिक्षणाची आणि संस्कारांची पाठशाळा
ऊसतोड कामगार आणि वीटभट्टी मजुरांच्या मुलांना अनेकदा शिक्षणापासून वंचित राहावे लागते. बालमजुरी किंवा भटकंतीच्या गर्तेत अडकणाऱ्या अशा निष्पाप चिमुरड्यांना सुरक्षित निवारा देऊन त्यांच्या हातात पाटी-पेन्सिल देण्याचे अत्यंत मोठे कार्य हा आश्रम करत आहे. केवळ निवाराच नव्हे, तर मुलांवर उत्तम संस्कार, दर्जेदार शिक्षण आणि त्यांच्यात स्वाभिमान जागवण्याचे काम येथे अहोरात्र सुरू आहे.
“मदत करणे हाच खरा मानवधर्म”
समाजातील दुर्बल घटकांना आधार देणे ही केवळ संस्थेची जबाबदारी नसून, तो प्रत्येक संवेदनशील माणसाचा मानवधर्म आहे. वाढती महागाई आणि वाढती मुलांची संख्या लक्षात घेता, या आश्रमाला आता समाजातील दानशूर व्यक्ती, सामाजिक संस्था आणि संवेदनशील नागरिकांच्या भक्कम आर्थिक व वस्तूस्वरूपातील मदतीची तातडीने गरज आहे.
आपल्या वाढदिवस, स्मृतिदिन किंवा कौटुंबिक आनंदाच्या क्षणी या निराधार चिमुकल्यांच्या चेहऱ्यावर हसू फुलवण्यासाठी प्रत्येकाने आपल्या परीने पुढे येणे गरजेचे आहे. एका हाताने दिलेली मदत या बालकांच्या भविष्याला नवी दिशा देऊ शकते.
संस्थेचे आवाहन:
अन्नधान्य, शैक्षणिक साहित्य, कपडे अथवा आर्थिक स्वरूपात मदत करू इच्छिणाऱ्या दानशूर व्यक्तींनी संस्थेशी थेट संपर्क साधावा, असे कळकळीचे आवाहन सहारा बाल सेवा आश्रम व श्रीनाथ बहुद्देशीय बाल विकास सामाजिक संस्थेच्या वतीने करण्यात आले आहे.
संस्थापक अध्यक्ष मारुती शिंदे व त्यांचे बाल सेवा प्रतिनिधी अशोक महादेव चौगुले, श्यामराव रामचंद्र चव्हाण, संस्थाचे अधीक्षक भैरू भोसले, सहयोगी दादाराव भोसले, महादेव शिंदे, गोपाल बाबर, नारायण माळवे, सुनील भोसले तसेच संस्थाचे आधारस्तंभ विजय कुमार इंगोले संजय जगताप यांनी केले आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
