मंगळवेढा टाईम्स न्युज नेटवर्किंग ।
अशोक खरात याचे उद्योग समोर आल्यानंतर आपला काहीही संबंध नाही, असे दाखविणाऱ्या महिला आयोगाच्या माजी अध्यक्षा रुपाली चाकणकर चांगल्याच अडकल्या आहेत.
महाराष्ट्रातील सत्तांतरावेळी जे गुवाहाटी चर्चेत आले, त्याच गुवाहाटीला अशोक खरात याच्यासोबत रुपाली चाकणकर यांनी दौरा केला. विशेष म्हणजे रुपाली चाकणकर यांच्या भगिनी प्रतिभा चाकणकर या देखील त्यांच्या दौऱ्यात सहभागी होत्या.
गुवाहाटीच्या हॉटेल ब्लू रॅडिसन येथे तिघांनीही तीन दिवस मुक्काम केला. अधोरेखित करण्यासारखी बाब म्हणजे खरात प्रकरणातच आर्थिक अफरातफरीचा आरोप ठेवून चाकणकर यांना ईडीने आज चौकशीसाठी बोलावले आहे. त्याआधी त्यांचा खरातसोबत गुवाहाटी दौरा समोर आल्याने चाकणकर चहूबाजूंनी अडकल्याचे बोलले जाते.
अशोक खरात याच्या नाशिकच्या मिरगावातील काळ्या कृत्यांनी संपूर्ण महाराष्ट्र हादरून गेला. श्रीमंत भक्तांना भुलवून त्यांच्याकडून लाखो रूपये उकळून, शेकडो महिलांचे लैंगिक शोषण करण्याचा कारनामे त्याने केले. त्याच्याच कार्यालयात काम करणाऱ्या एका कर्मचाऱ्याने हा संपूर्ण प्रकार उघडकीस आणला.
याच प्रकरणात खरात सोबत असलेल्या जवळीकतेमुळे चाकणकर यांना राजीनामा द्यावा लागला. खरातसोबत आपले थेट संबंध नव्हते, त्यांना केवळ आध्यामिक गुरू मानत होते, असे सांगून रुपाली चाकणकर यांनी हात झटकण्याचा प्रयत्न केला.
परंतु खरात याची दीड महिना चौकशी करून एसआयटीने चाकणकर यांनाही चौकशीसाठी पाचारण केल्याने त्यांच्यासाठी हा मोठा धक्का होता. आता खरातसोबतच्या गुवाहाटी दौऱ्याने त्यांचा पाय अधिक खोलात गेला आहे.
चाकणकर भगिनी-अशोक खरात यांचा गुवाहाटी दौरा कधी?
भोंदू अशोक खरात आणि रूपाली चाकणकर यांनी २०२१ मध्ये गुवाहाटी दौरा केला होता. भोंदू खरात याच्यासोबत आपला काहीच संबंध नाही म्हणणाऱ्या रूपाली चाकणकर आणि त्यांच्या बहिण प्रतिभा चाकणकर यांनी सोबत दौरा केल्याने आणि गुवाहाटीमध्ये मुक्काम केल्याने त्यांच्यातील जवळीकता यानिमित्ताने अधोरेखित होत आहे.
विशेष म्हणजे गुवाहाटीच्या रेडीसन ब्लू हॉटेलमध्ये एकाच तारखांना तिघेही वास्तव्यास होते. २८ ॲागस्ट २०२१ ते ३० ॲागस्ट २०२१ या तारखांना हे तिघेही रेडीसन ब्लू या हॉटेलमध्ये वास्तव्यास होते.
या तारखांमध्ये त्यांनी कामाख्या देवीचे दर्शन घेऊन पूजा अर्जा केल्याची शक्यता आहे. अशोक खरात भक्तांकडून लाखो रुपये घेऊन ज्या पूजा अर्चा करायचा, तशीच पूजा अर्चा गुवाहाटीमध्ये केल्याची चर्चा आहे.
पूजा अर्चेसाठी गुवाहाटी प्रसिद्ध
गुवाहाटीतील मंदिर नऊ ग्रहांच्या पूजेसाठी प्रसिद्ध आहे. ब्रह्मपुत्रा नदीच्या मध्यभागी असलेल्या बेटावर शिवाचे मंदिर आहे. येथे विशेष पूजा अर्चा केल्या जातात. खरात याने अंगठीतील कथित ग्रहांचे खडे देऊन भक्तांना लाखो रुपयांना गंडा घातल्याचा आरोप आहे.
चाकणकरांची आज ईडीकडून चौकशी
खरात प्रकरणात आरोप झाल्यानंतर चाकणकर यांच्या संपत्तीची चौकशी झाली पाहिजे, अशी मागणी विरोधकांनी केली. पोलीस तपासांत गरज पडली तर त्यांची चौकशी करू, अशी भूमिका सरकारने स्पष्ट केली.
खरात याची दीड महिना चौकशी झाल्यानंतर चाकणकरांना एसआयटीने चौकशीसाठी पाचारण केले. असे असताना त्यांना ईडीकडून समन्स बजावण्यात आले असून आज त्यांची ईडीकडून चौकशी होणार असल्याचे वृत्त आहे.
दुसरीकडे रुपाली चाकणकर यांची गुवाहाटी दौऱ्याच्या वृत्तावर अद्याप पर्यंत प्रतिक्रिया येऊ शकलेली नाही.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
