सोलापूर जिल्हा प्रशासनाचा मोठा निर्णय; ‘सुराज्य ग्राम मुक्काम मोहीम’ सुरू; कार्यालयांचे उंबरठे झिजवणे बंद; अधिकारी थेट तुमच्या गावात मुक्कामाला येणार

मंगळवेढा टाईम्स न्युज नेटवर्किंग ।

सामान्य नागरिक, शेतकरी आणि कष्टकरी बांधवांना त्यांच्या छोट्या-मोठ्या कामांसाठी किंवा तक्रारींसाठी आता तालुका किंवा जिल्हा कार्यालयांचे उंबरठे झिजवावे लागणार नाहीत.

जनतेच्या समस्या त्यांच्याच गावात सोडवण्यासाठी सोलापूर जिल्हा प्रशासनाने छत्रपती शिवाजी महाराज महाराजस्व अभियानांतर्गत सुराज्य ग्राम मुक्काम मोहीम हा अत्यंत महत्त्वाचा आणि नाविन्यपूर्ण उपक्रम हाती घेतला आहे.

याअंतर्गत दर बुधवार किंवा गुरुवारी जिल्हाधिकारी, उपजिल्हाधिकारी आणि तहसीलदारांसह प्रशासकीय अधिकारी गावात मुक्काम करून जनतेच्या तक्रारी सोडवणार आहेत, अशी माहिती निवासी उपजिल्हाधिकारी अभिजित पाटील यांनी दिली.

तालुकास्तरीय सर्व प्रमुख अधिकारी आठवड्यातील बुधवार किंवा गुरुवारपैकी एका दिवशी एका गावाला भेट देतील. विशेष म्हणजे हे सर्व अधिकारी रात्री गावातच मुक्काम करतील आणि ग्रामस्थांशी थेट संवाद साधून त्यांच्या तक्रारींचे निराकरण करतील.

या अधिकाऱ्यांच्या पथकात तहसीलदार, गटविकास अधिकारी, पोलिस निरीक्षक, तालुका कृषी अधिकारी, तालुका आरोग्य अधिकारी, महावितरणचे उपअभियंता यांच्यासह इतर सर्व महत्त्वाच्या विभागांच्या अधिकाऱ्यांचा समावेश असेल. या मुक्कामाचा खर्च अधिकाऱ्यांनी स्वखर्चाने करावयाचा आहे.

गावागावात जनजागृती

अधिकाऱ्यांच्या मुक्कामाची पूर्वकल्पना ग्रामस्थांना असावी यासाठी गावात अधिकारी येण्यापूर्वी २ दिवस आधी मंदिरात, सार्वजनिक ठिकाणी ध्वनीक्षेपकाद्वारे सूचना दिली जाईल.

तसेच ग्रामपंचायत व चावडीवर भित्तीपत्रके, व्हॉट्सअॅप ग्रुप्सवर वेळापत्रक, शाळेत सकाळच्या परिपाठात विद्यार्थ्यांना या मोहिमेची माहिती दिली जाणार आहे.

उत्कृष्ट काम करणाऱ्या गावाची होणार निवड

या मोहिमेच्या प्रभावी अंमलबजावणीसाठी दुसऱ्या शनिवारी उपविभागीय अधिकारी तालुकास्तरावर आढावा घेतील. तर, चौथ्या शनिवारी स्वतः जिल्हाधिकारी जिल्हास्तरावर अंतिम अहवाल तपासून त्रुटी निवारण करतील.

दर महिन्याला गुणवत्तेचा आढावा घेऊन उत्कृष्ट काम करणाऱ्यागावांची निवड केली जाणार आहे.-अभिजीत पाटील, निवासी उपजिल्हाधिकारी

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.