मंगळवेढा टाईम्स न्युज नेटवर्किंग ।
शिक्षिकेच्या असंवेदनशील वृत्तीचा धक्कादायक प्रकार समोर आला आहे. विशाखापट्टनम येथील एका खासगी शाळेतील सीसीटीव्ही व्हिडीओ सध्या व्हायरल होत आहे.
विद्यार्थ्याने गृहपाठ केला नव्हता, म्हणून शिक्षिकेने त्याला मारझोड केली, यानंतर गूढ परिस्थितीत मुलाचा मृत्यू झाल्याचा आरोप त्याच्या पालकांनी केला.
मुलाच्या पालकांनी केलेल्या आरोपानुसार आणि सीसीटीव्ही व्हिडीओमध्ये जे दिसत आहे त्यानुसार, शिक्षिका मुलांचा गृहपाठ तपासत आहे. निधन पावलेल्या मुलाचा अपूर्ण गृहपाठ पाहून ती संतापते.
यावेळी भेदरलेला मुलगा रडत रडत मारू नका, अशी गयावया करत आहे. तरीही शिक्षिका त्याच्या कानशिलात लगावते. यानंतर पुढच्याच क्षणाला सदर मुलगा शिक्षिकेच्या अंगावर कोसळतो.
दरम्यान मुलाच्या मृत्यूचे नेमके कारण अद्याप समोर आलेले नाही. मृत्यूच्या कारणाचा तपास सुरू आहे.
या घटनेचा तपास करणाऱ्या पोलिसांनी सीसीटीव्ही व्हिडीओ ताब्यात घेतला आहे. या व्हिडीओत शिक्षिका मुलावर ओरडताना दिसत आहे. शिक्षिका संतापल्याचे पाहून मुलगा रडू लागतो.
हात जोरजोरात हलवून तो विनवणी करत असल्याचे दिसत आहे. त्यानंतर शिक्षिका त्याच्या शर्टाला पकडून मुलाला खेचते. त्याचा गणवेश ठिक करत असताना ती मुलाच्या गालावर चापट मारते. पुढच्या काही सेकंदातच मुलगा शिक्षिकेच्या अंगावर कोसळतो.
मुलगा खाली कोसळल्यानंतर शिक्षिका त्याला उचलण्याचा प्रयत्न करते. परंतु मुलगा कोणताही प्रतिसाद देत नाही. यानंतर मुलाला रुग्णालयात दाखल करण्यात आले, मात्र तिथे त्याला मृत घोषित केले गेले. मुलाच्या कुटुंबीयांनी शिक्षिका आणि शाळा व्यवस्थापनावर कठोर कारवाई करण्याची मागणी केली आहे.
पोलिसांनी सदर घटनेप्रकरणी गुन्हा दाखल करून तपास सुरू केला आहे. सदर मुलाबरोबर नेमके काय घडले? याचा तपास केला जात आहे. मुलाच्या वडिलांनी दावा केला की, मुलाचा मृत्यू झाल्यानंतर शाळेतून त्यांना फोन केला गेला नाही. त्यांच्या एका नातेवाईकाने या घटनेची माहिती त्यांना दिली. तसेच घटनेच्या दिवशी मुलाची प्रकृती बरी नव्हती, ही शक्यता त्यांनी फेटाळून लावली.
मुलाच्या पार्थिवाचे शवविच्छेदन अहवाल अद्याप प्राप्त न झाल्याने पोलिसांनी याबद्दल पुढील माहिती दिलेली नाही.
दरम्यान आंध्र प्रदेशचे मनुष्यबळ विकास मंत्री नरा लोकेश यांनी या घटनेनंतर शोक व्यक्त केला. शिक्षिकेने केलेल्या मारहाणीमुळे सहा वर्षांच्या मुलाचा जीव गेल्याचे पाहून हृदय पिळवटून निघाले, अशी प्रतिक्रिया त्यांनी दिली.
‘आम्ही दोषी शिक्षक आणि शाळा व्यवस्थापनावर कायदेशीर कारवाई करत आहोत. मी सदर मुलाच्या पालकांप्रति माझ्या मनपूर्वक संवेदना व्यक्त करतो. खंबीर राहा. तुमच्या कुटुंबाचे हे नुकसान कोणीही भरून काढू शकत नाही. आमचे सरकार सर्वतोपरी तुमच्या पाठीशी उभे राहील’, असेही नरा लोकेश म्हणाले.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
