टीम मंगळवेढा टाईम्स।
सोलापूर माढा लोकसभा मतदारसंघातील राजकीय नाट्यानंतर राष्ट्रवादी काँग्रेसतर्फे धैर्यशील मोहिते-पाटील तर भाजपतर्फे विद्यमान खासदार रणजित नाईक-निंबाळकर आणि सोलापुरातील उमेदवार आमदार राम सातपुते यांचे उमेदवारी अर्ज मंगळवारी दाखल होणार आहेत.
भाजपच्या दोन्ही उमेदवारांसाठी उपमुख्यमंत्री देवेंद्र फडणवीस शहरात दाखल होत आहेत तर मोहिते यांच्यासाठी शरद पवार यांचा ठरलेला दौरा अचानक रद्द झाला आहे.
भारतीय जनता पक्षातर्फे जुना पुणे नाका येथून मिरवणुकीने येऊन जिल्हाधिकारी कार्यालय सात रस्ता येथे उमेदवारी अर्ज दाखल करण्यात येणार आहे. छत्रपती संभाजी महाराज पुतळ्याला पुष्पहार अर्पण करून मिरवणूक सकाळी दहा वाजता सुरू होईल.
ती छत्रपती शिवाजी महाराज चौक, मेकॅनिक चौक, सरस्वती चौक,चार हुतात्मा चौक, डॉ. आंबेडकर चौक, जुना एम्प्लॉयमेंट चौक मार्गे सात रस्ता असा मिरवणुकीचा मार्ग असेल.
तत्पूर्वी उपमुख्यमंत्री देवेंद्र फडणवीस यांचे सोलापुरात आगमन होणार आहे. ते लातूरच्या विमानतळावर उतरतील. तेथून हेलिकॉप्टरने एमआयटी कॉलेजच्या मैदानावर त्यांचे आगमन होईल.
नारायण पाटील, उत्तम जानकरांच्या भूमिकेकडे माढ्याचे लक्ष
सोलापूर मतदारसंघासाठी राहुल गायकवाड तर माढ्यासाठी रमेश बारसकर या दोन्ही वंचित आघाडीच्या उमेदवारांनी सोमवारी निवडणूक निर्णय अधिकारी यांच्याकडे आपला अर्ज दाखल केला. यावेळी दोन्ही उमेदवारांनी कार्यकत्यांची रॅली काढून शक्तीप्रदर्शन केले. नारायण पाटील व उत्तम जानकरांच्या भूमिकेकडे लक्ष लागले आहे.
सोलापूर आणि माढा या दोन्ही मतदारसंघांसाठी सोलापुरातील सात रस्ता येथील जिल्हाधिकारी कार्यालयात उमेदवारी अर्ज दाखल करण्याची प्रक्रिया सुरू आहे. निवडणूक निर्णय अधिकारी म्हणून माढ्यासाठी मोनिका ठाकूर तर सोलापूरसाठी कुमार आशिर्वाद हे काम पहात आहेत.
अपक्ष उमेदवार शिवाजी सोनवणे यांनी सोलापूर तर माढा लोकसभेसाठी श्रीरामचंद्र घुटूकडे यांनी उमेदवारी अर्ज दाखल केला. त्यामुळे मंगळवारी सोलापूरसाठी एकूण २ आणि माढ्यासाठी २ असे ४ उमेदवारांचे अर्ज दाखल झाले.
दरम्यान, सोलापूर लोकसभेसाठी सोमवारी १६ व्यक्तींनी ३६ अर्ज नेले. आतापर्यंत एकूण ५४ व्यक्तींनी ९४ अर्ज घेऊन गेलेले आहेत. माढा लोकसभेसाठी सोमवारी ३२ व्यक्तींनी ५३ अर्ज नेले. आतापर्यंत एकूण ७९ व्यक्तींनी ११७ अर्ज या मतदारसंघासाठी घेतले.
मोहिते निवडक नेत्यांसोबत येणार सोलापुरात
राष्ट्रवादी काँग्रेस शरदचंद्र पवार पक्षाचे उमेदवार धैर्यशील मोहिते-पाटील यांचा उमेदवारी अर्ज दाखल करण्यासाठी शरद पवार सोलापुरात येणार होते.
पण दौरा अचानक रद्द झाल्याने आता मोहिते- पाटील हे शक्ती प्रदर्शन न करता निवडक नेत्यांसमवेत येऊन उमेदवारी अर्ज दाखल करणार असल्याचे सांगण्यात आले.(स्रोत:दिव्य मराठी)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
