टीम मंगळवेढा टाईम्स ।
सोलापूर विद्युत ठेकेदाराचा परवाना देण्यासाठी मागणी केलेल्या रकमेपैकी १५ हजारांची लाच स्वीकारल्याप्रकरणी सहायक विद्युत निरीक्षकाला रंगेहाथ पकडण्यात आले.
ही कारवाई सोमवारी सायंकाळी ६ वाजण्याच्या सुमारास अंत्रोळीकर नगरातील विद्युत निरीक्षक कार्यालयात करण्यात आली.
या प्रकरणी विजापूर नाका पोलीस ठाण्यात गुन्हा दाखल करण्यात आला आहे. फैजुलअल्ली मेहबूब मुल्ला ( वय ५३ ) असे अटक करण्यात आलेल्या सहायक विद्युत निरीक्षकाचे नाव आहे.
विद्युत निरीक्षक कार्यालयात इलेक्ट्रिकलची कामे घेण्याकरिता नवीन फॉर्म देण्याचे काम सुरू होते.
तक्रारदाराने आवश्यक असणारा विद्युत पर्यवेक्षक परवाना तसेच विद्युत ठेकेदार परवाना मिळवण्यासाठी विद्युत निरीक्षक विभाग, सोलापूर येथे अर्ज केला होता.
तक्रारदाराला विद्युत पर्यवेक्षक परवाना मिळाला आहे. परवाना तक्रारदार विद्युत ठेकेदार मिळवण्याकरिता पाठपुरावा करीत होता.
तेव्हा तक्रारदाराला यापूर्वी दिलेल्या विद्युत पर्यवेक्षक परवान्याचे बक्षीस म्हणून १० हजार रुपये व सध्याच्या ठेकेदार परवान्याचे २२ हजार अशी एकूण ३२ हजार रुपयांच्या लाचेची मागणी केली.
तक्रारदाराने याबाबत लाचलुचपत प्रतिबंधक विभागाशी संपर्क साधला. लाचलुचपत प्रतिबंधक विभागाच्या पथकाने कार्यालयात सापळा रचून , ३२ हजारांचा पहिला हप्ता म्हणून १५ हजार रुपये स्वीकारताना रंगेहाथ पकडले.
ही कारवाई लाचलुचपत प्रतिबंधक विभागाचे पोलीस उपअधीषक संजीव पाटील, पोलीस निरीक्षक उमाकांत महाडिक, हवालदार शिरीषकुमार सोनवणे, पोलीस नाईक श्रीराम घुगे, पोलीस शिपाई प्रफुल्ल जानराव,स्वप्नील सण्णके, चालक सुरवसे यांनी पार पाडली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
