सोलापुरातील मसाज पार्लरवर पोलिसांचा छापा! तीन मुलींसह दहाजण ताब्यात

सोलापूर शहरातील भागवत चित्र मंदिर परिसरातील इमारतीच्या पहिल्या मजल्यावर एका व्यक्‍तीने गॅलेक्‍सी स्पा ऍण्ड मसाज पार्लर सुरु केले होते.

मात्र, त्याठिकाणी मसाज अथवा स्पाचे काम सोडून वेश्‍या व्यवसायही सुरु झाला होता. या इमारतीपासून हाकेच्या अंतरावरच एक पोलिस चौकी असतानाही हा सगळा प्रकार गुपचूप सुरु होता.

रविवारी (ता. 21) शहर स्थानिक गुन्हे शाखेला त्याची माहिती मिळाली आणि पोलिसांनी त्याठिकाणी छापा टाकला. त्यावेळी पोलिसांना मिझोराम, नागालॅण्ड येथील मुली आढळल्या. पोलिसांनी तीन मुलींसह दहाजणांना ताब्यात घेतले आहे.

पोलिसांना वेश्‍या व्यवसायाची माहिती मिळाल्यानंतर त्यांनी एक बनावट ग्राहक त्याठिकाणी पाठविला.वेश्‍या व्यवसायाची खात्री पटल्यानंतर गुन्हे शाखेचे पथक त्याठिकाणी दाखल झाले.

वरिष्ठ पोलिस निरीक्षक संजय साळुंखे, सहायक पोलिस निरीक्षक अजित कुंभार यांनी त्याठिकाणी धाव घेतली. पोलिसांनी त्याठिकाणीच्या महिलांना व पुरुषांना ताब्यात घेतले असून आता त्यांना न्यायालयात हजर केले जाणार आहे. फरार असलेल्या मालकाचा शोध सुरु असल्याची माहिती श्री. साळुंखे यांनी दिली.