टीम मंगळवेढा टाईम्स ।
मार्च महिन्यात अवकाळी पावसामुळे शेतकऱ्यांच्या हातातोंडाशी आलेला घास हिरावला गेला आहे. पण आता पुन्हा एकदा राज्यातील काही भागात पावसाची शक्यता वर्तविण्यात आली आहे. हवामान विभागाकडून याबाबतची माहिती देण्यात आलेली आहे.
महत्त्वाची गोष्ट म्हणजे बंगालच्या उपसागरामध्ये वादळाची स्थिती निर्माण झालेली असल्याने महाराष्ट्रातील बहुतेक जिल्ह्यामध्ये पावसासाठी पोषक असे हवामान तयार झालेले आहे.
त्यामुळे राज्यातील मराठवाडा, मध्य महाराष्ट्र, विदर्भासह अन्य भागात येत्या 24 तासांत विजा, मेघगर्जनेसह वादळी पाऊस होणार असल्याची माहिती हवामान विभागाकडून देण्यात आलेली आहे.
मागच्या 24 तासांत चंद्रपूर येथे देशातील उच्चांकी 40.2 अंश सेल्सिअस तापमानाची नोंद करण्यात आली आहे. तर सोलापूर, परभणी, अकोला, अमरावती, ब्रह्मपुरी, वर्धा, वाशीम येथे 39 अंश सेल्सिअस तापमान नोंदवले गेले आहे.
कोकण वगळता उर्वरित राज्यात बहुतांश ठिकाणी कमाल तापमान 35 ते 39 अंशांच्या दरम्यान होते. तर किमान तापमान कमी-अधिक होत आहे. पारा 14 ते 25 अंशांच्या दरम्यान होता.
छत्तीसगड पासून विदर्भ, तेलंगणा, कर्नाटक ते दक्षिण तमिळनाडूपर्यंत समुद्र सपाटीपासून 900 मीटर उंचीवर हवेचा कमी दाबाचा पट्टा व खंडित वाऱ्यांची स्थिती कायम आहे.
पश्चिम राजस्थान आणि परिसरावर समुद्र सपाटीपासून 1.5 किलोमीटर उंचीवर, तसेच उत्तर मध्य प्रदेश आणि परिसरावर 900 मीटर उंचीवर चक्राकार वाऱ्यांची स्थिती आहे.
दरम्यान, गेल्या दोन वर्षांपासून पावसावर परिणाम करणाऱ्या अल निनो वादळामुळे यंदाच्या वर्षी देखील पावसावर परिणाम होणार आहे.
प्रशांत महासागरात अल निनो वादळ पुन्हा सक्रिय झाल्याने यंदा राज्यात 90 टक्के पाऊस पडण्याची शक्यता आहे. तसेच, मराठवाडा आणि मध्य महाराष्ट्रात गारपीट होण्याची शक्यता असल्याची माहिती हवामान विभागाकडून देण्यात आली आहे.
तसेच, शुक्रवारी मध्य महाराष्ट्र आणि विदर्भासोबतच रत्नागिरी आणि सिंधुदुर्ग येथेही पाऊस पडू शकतो अशी माहिती हवामान विभागाकडून देण्यात आली आहे.
नाशिक, अहमदनगर, पुणे या जिल्ह्यात देखील तुरळक ठिकाणी मेघगर्जनेसह पावसाची शक्यता असल्याचे सांगण्यात आले आहे. कोल्हापूर, सातारा, सांगली, सोलापूर, बीड, उस्मानाबाद येथे शनिवारपर्यंत तुरळक ठिकाणी मेघगर्जनेसह पावसाचा अंदाज भारतीय हवामान विभागाने वर्तवला.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
