रक्ताच्या नात्याप्रमाणे सूर्योदय परिवार सदैव तुमच्या पाठीशी उभा राहील; अनिलभाऊंची भावनिक साद; सेवानिवृत्त व पदोन्नत कर्मचाऱ्यांचा ‘शाही सन्मान’

टीम मंगळवेढा टाईम्स । ​सांगोला : बाळासाहेब झिंजुरटे

केंद्रीय अथवा राज्य सरकारी कर्मचारी म्हणून आपल्या आयुष्यातील ३० ते ४० वर्षे अत्यंत तळमळीने सेवा करून कृतार्थ भावनेने सेवानिवृत्त झालेल्या कर्मचाऱ्यांच्या निष्ठेचा गौरव व्हावा, याच उदात्त भावनेने या सन्मान सोहळ्याचे आयोजन करण्यात आले आहे.

एलकेपी मल्टीस्टेट, सूर्योदय अर्बन किंवा सूर्योदय मॉल अशा सूर्योदय ग्रुपच्या प्रत्येक व्यवसायावर आपल्यासारख्या थोरा-मोठ्यांच्या आशीर्वादाची छत्रछाया आहे. याच आशीर्वादाच्या बळावर सूर्योदय ग्रुपची गगनभरारी सुरू आहे,” असे भावनिक उद्गार सूर्योदय परिवाराचे कुटुंबप्रमुख आणि एल. के. पी. मल्टीस्टेटचे चेअरमन अनिलभाऊ इंगवले यांनी व्यक्त केले.

​सांगोला आणि मंगळवेढा तालुक्यातील विविध शासकीय खात्यांमधून सेवानिवृत्त झालेल्या, तसेच नुकतीच पदोन्नती (प्रमोशन) मिळालेल्या कर्मचारी व अधिकाऱ्यांचा भव्य सन्मान सोहळा सूर्योदय बँक्वेट हॉल, सांगोला येथे आयोजित करण्यात आला होता. याप्रसंगी ते बोलत होते.

हाकेला धावून येणारे नाते: रक्ताची गरज भासली तरी सूर्योदय तत्पर

​अनिलभाऊ इंगवले पुढे म्हणाले की, “या सोहळ्याच्या निमित्ताने आपणा सर्वांचे सूर्योदय परिवारासोबत एक भावनिक आणि अतूट नाते निर्माण झाले आहे. आगामी आयुष्यात कोणत्याही कठीण प्रसंगी, अगदी रक्ताच्या बॉटलची जरी गरज भासली, तरी आम्ही आपल्या एका हाकेवर धावून येऊ.”

​पावणेदोनशे सत्कारमूर्तींचा ‘शाही सन्मान’

प्राथमिक व माध्यमिक शिक्षक, महाविद्यालयीन प्राध्यापक, ​सैन्यदलातील जवान, ​महसूल, पोलीस आणि आरोग्य विभाग, ​नगरपालिका व महावितरण (MSCB) ​अशा विविध खात्यांमधील वर्षभरात सेवानिवृत्त झालेल्या सुमारे पावणेदोनशे (१७५) अधिकारी व कर्मचारी बांधवांचा त्यांच्या परिवारासह गौरव करण्यात आला. प्रत्येक सत्कारमूर्तीला मानाचा फेटा, मायेची शाल आणि सन्मानचिन्ह देऊन शाही पद्धतीने सन्मानित करण्यात आले.

​प्रा.संभाजी यादव यांच्या ‘वैचारिक मेजवानी’ने रंगली सभा

कार्यक्रमाचे मुख्य पाहुणे, राधानगरी (कोल्हापूर) येथील प्रसिद्ध विनोदी वक्ते प्रा. संभाजी यादव यांनी सुमारे दीड तास आपल्या अमोघ वाणीने उपस्थितांना खिळवून ठेवले. त्यांनी आपल्या व्याख्यानातून अनेक वैशिष्ट्यपूर्ण हुबेहूब आवाज काढत आणि विनोदी प्रसंग सांगत उपस्थितांना मंत्रमुग्ध केले व अत्यंत चिंतनीय मार्गदर्शन केले.

​यावेळी क्रीडा शिक्षक शहाजी घाडगे सर, मुख्याध्यापिका सौ. संगीता गायकवाड मॅडम, केंद्रप्रमुख हमजू मुलानी आणि सूर्योदय उद्योग समूहाचे सहसंस्थापक जगन्नाथ भगत गुरुजी यांनीही आपली मनोगते व्यक्त केली.

​मंचावर मान्यवरांची मांदियाळी

​या सोहळ्याला सूर्योदय दूध विभागाचे चेअरमन डॉ. बंडोपंत लवटे, एल. के. पी. मल्टीस्टेटचे व्हा. चेअरमन सुभाष दिघे गुरुजी, सूर्योदय महिला अर्बनच्या चेअरमन सौ.अर्चनाताई इंगवले, व्हा. चेअरमन सौ. ज्योतीताई भगत, सूर्योदय परिवाराच्या संचालिका सौ. मीनाक्षीताई दिघे, सौ. सुरेखाताई लवटे आणि सूर्योदय परिवाराचे संचालक प्रशांत पाटील यांसह अनेक मान्यवर उपस्थित होते.

​स्मरणार्थ क्षण…

सूर्योदय समूहाने दिलेले आग्रहाचे निमंत्रण, प्रत्येकाची आस्थेने केलेली विचारपूस, शाही सन्मान आणि प्रा. यादव यांची वैचारिक मेजवानी यामुळे हा सोहळा आमच्या आयुष्यात कायम स्मरणात राहील,” अशा कृतज्ञतापूर्वक भावना सत्कारमूर्तींनी व्यक्त केल्या.

​कार्यक्रमानंतर सर्व उपस्थितांसाठी स्नेहभोजनाची उत्तम व्यवस्था करण्यात आली होती. हा कार्यक्रम यशस्वी करण्यासाठी सूर्योदय अर्बन, सूर्योदय फाउंडेशन, सूर्योदय महिला अर्बन आणि एल. के. पी. मल्टीस्टेटच्या सर्व कर्मचारी वृंदांनी अथक परिश्रम घेतले.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज