क्रेडिट कार्ड नंबर तसेच बँक यूजर आयडी मिळवून अनोळखी मोबाइलधारकाने राजेंद्र रामराव खाडप ( रा. आसरा चौक, होटगी रस्ता ) यांची सुमारे ६४ हजार रुपयांची ऑनलाइन फसवणूक केली आहे.
खाडप यांच्या घरातील कपडे धुण्याची मशीन नादुरुस्त झाल्याने त्यांनी ती दुरुस्त करण्यासाठी गुगलवरुन आयबीएफ कंपनीच्या कस्टमर केअरचा मोबाइल नंबर मिळविला आणि त्यावर फोन केला होता. समोरील व्यक्तीने प्रतिनिधी पाठवण्याकरिता गुगल प्ले स्टोअरवरुन एक ॲप डाउनलोड करुन त्यावरुन ऑनलाइन एक रुपया पाठविण्याची विनंती केली.
यानंतर अनोळखी व्यक्तीने खाडप यांना क्रेडिट कार्ड नंबर टाकण्यास सांगितले. त्याप्रमाणे त्यांनी ॲपवर संपूर्ण माहिती दिली. काही वेळातच त्यांच्या क्रेडिट कार्डवरून १९ हजार ९९९ रुपये किमतीचे विमान कंपनीचे तिकीट काढण्यात आल्याचा संदेश आला. त्यावर अनोळखी व्यक्तीने राजेंद्र यांना चुकून रक्कम दुसऱ्या खात्यावर गेली असून ती परत त्यांच्या खात्यावर टाकण्याचे आश्वासन दिले होते.
दरम्यान अनोळखी मोबाईलधारकाने खाडप यांचा नेट बँकिंग यूजर आयडी विचारुन घेतला. त्याचबरोबर पासवर्डही त्याने बोलता बोलता माहीत करून घेतला. क्रेडिट कार्ड तसेच बँक यूजर आयडीचा वापर करून मोबाइलधारकाने त्यांच्या बँक खात्यातून आणखी ४३ हजार रुपये ऑनलाइन काढून ते खर्च केल्याचा संदेश पुन्हा त्यांना आला.
अशी एकूण ६४ हजारांची रक्कम मोबाइलधारक भामट्याने काढून फसवणूक केल्याचे लक्षात येताच फिर्यादीने विजापूर नाका पोलिसात तक्रार दिली. या तक्रारीवरुन फसवणूक व माहिती तंत्रज्ञान कायद्यान्वये गुन्हा दाखल झाला आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज