टीम मंगळवेढा टाईम्स (विशेष प्रतिनिधी):
सोलापूर जिल्ह्यात यंदा पावसाने दगा दिल्याने भीषण परिस्थिती निर्माण झाली आहे. सरासरीच्या तुलनेत तब्बल ५० टक्क्यांपेक्षा कमी पाऊस आणि सलग तीन आठवड्यांहून अधिक काळ पडलेला पावसाचा मोठा खंड यामुळे मंगळवेढा तालुक्यातील खरीप पिके करपून जाण्याच्या मार्गावर आहेत.
हातचे पीक जाण्याच्या भीतीने बळीराजा पूर्णपणे हवालदिल झाला असून, या पार्श्वभूमीवर परिस्थितीचे गांभीर्य लक्षात घेऊन प्रशासनाने तातडीने पावले उचलली आहेत.
पिकांच्या नुकसानीची प्रत्यक्ष पाहणी करून वस्तुनिष्ठ व शास्त्रीय अहवाल तयार करण्यासाठी आज १० सप्टेंबर रोजी सकाळी १० वाजल्यापासून तालुक्यात विशेष संयुक्त पाहणी मोहीम राबवली जाणार आहे.
शासकीय आदेशानुसार उच्चस्तरीय समिती गठीत
राज्यस्तरीय दुष्काळ देखरेख समितीचे अध्यक्ष तथा कृषी आयुक्त यांच्या पत्रान्वये आणि जिल्हाधिकारी सोलापूर यांच्या आदेशानुसार ही पाहणी निश्चित करण्यात आली आहे.
तालुका कृषी अधिकाऱ्यांनी काढलेल्या अधिकृत पत्रानुसार, या पाहणी पथकात प्रशासकीय अधिकारी, कृषी शास्त्रज्ञ आणि शेतकरी प्रतिनिधींचा थेट समावेश करण्यात आला आहे.
यामध्ये उपविभागीय अधिकारी बी आर माळी, मंगळवेढ्याचे तहसीलदार मदन जाधव, गट विकास अधिकारी, तालुका कृषी अधिकारी मनीषा मिसाळ, सोलापूर कृषी विज्ञान केंद्राचे प्रमुख शास्त्रज्ञ व विषय तज्ज्ञ, तसेच सेंद्रिय कृषीभूषण पुरस्कारप्राप्त शेतकरी अंकुश पडवळे यांचा समावेश आहे.
पाहणीदरम्यान खालील प्रमुख मुद्द्यांची होणार शास्त्रीय तपासणी:
पिकांची सद्यस्थिती: पावसाअभावी खुंटलेली पिकांची वाढ आणि करपलेली क्षेत्रे.
जमिनीतील ओलावा: पावसाच्या दीर्घ खंडामुळे जमिनीतील घटलेला ओलावा आणि त्याचा मुळांवर झालेला परिणाम.
रोग व किडींचा प्रादुर्भाव: बदलत्या हवामानामुळे आणि ओलाव्याअभावी पिकांवर पसरलेल्या कीड-रोगांची व्याप्ती.
संभाव्य उत्पादन घट: खरिपाच्या अंतिम उत्पादनात होणारी अंदाजे टक्केवारीतील घट.
निवडक गावांत प्रत्यक्ष बांधावर जाऊन नोंदवणार नोंदी
हे संयुक्त पथक मंगळवेढा तालुक्यातील दुष्काळसदृश परिस्थितीने बाधित निवडक गावांना थेट भेटी देणार आहे.
केवळ कागदोपत्री अहवाल न करता शेतकऱ्यांच्या प्रत्यक्ष बांधावर जाऊन पिकांची अवस्था तपासली जाणार आहे. कृषी विज्ञान केंद्राचे शास्त्रज्ञ शास्त्रीय निकषांच्या आधारे नुकसानीचे मूल्यांकन करतील, तर शेतकरी प्रतिनिधी स्थानिक वास्तव प्रशासनासमोर मांडतील.
शेतकऱ्यांचे लक्ष अहवालाकडे
तालुक्यातील बाजरी, तूर, सोयाबीन, मूग, उडीद यांसारखी महत्त्वाची खरीप पिके पावसाच्या खंडामुळे संकटात सापडली आहेत. विहिरी आणि कूपनलिकांच्या पाणीपातळीतही कमालीची घट झाली आहे.
उद्या होणाऱ्या या संयुक्त पाहणीनंतर शासनाला सादर होणाऱ्या अहवालावरच तालुक्यातील दुष्काळ जाहीर करणे, नुकसानभरपाई आणि विमा परतावा मिळणे अवलंबून असल्याने संपूर्ण तालुक्यातील बळीराजाचे लक्ष या दौऱ्याकडे लागले आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
