टीम मंगळवेढा टाईम्स ।
शिक्षक व शिक्षणाचे राज्यस्तरीय प्रश्नांची सोडवणूक करण्यासाठी चर्चा करणे व पुढील दिशा ठरविण्यासाठी महाराष्ट्र राज्य प्राथमिक शिक्षक संघाची महामंडळ सभा आज रविवार दि.24 रोजी राजपूत मंगल कार्यालय मंगळवेढा येथे आयोजित केल्याची माहिती शिक्षक संघाचे राज्य उपाध्यक्ष संजय चेळेकर यांनी दिली.
शिक्षक नेते संभाजीराव थोरात यांच्या अध्यक्षतेखाली होणाऱ्या राज्यस्तरीय महामंडळ सभेस राज्यभरातून तालुका व जिल्हास्तरावरील संघटनेचे पदाधिकारी उपस्थित राहणार आहेत.
जुनी पेन्शन योजना लागू करणे, शिक्षक बदली धोरणात दुरुस्ती करणे यासारख्या मागण्यांबाबत सभेत ऊहापोह होणार आहे. महामंडळ सभेच्या माध्यमातून महाराष्ट्र राज्य प्राथमिक शिक्षक संघाने अनेक महत्त्वपूर्ण शासकीय धोरणांना दिशा दिली आहे.
कोरोना काळात राज्यस्तरीय शिक्षक प्रश्नांवर महामंडळे व अधिवेशन यामधून चर्चा, विचारमंथन या गोष्टींना मर्यादा आल्यानंतर प्रथमच शिक्षक संघाची महामंडळ सभा होत असल्याने शिक्षकांमध्ये चैतन्याचे वातावरण निर्माण झाले आहे.
सभेसाठी राज्य शिक्षक संघाचे अध्यक्ष बाळकृष्ण तांबारे, सरचिटणीस अप्पासाहेब कुल, कार्याध्यक्ष अंबादास वाझे, कोषाध्यक्ष जनार्दन निउंगरे, मोहन भोसले, एन वाय पाटील, विनोद राऊत , अनुराधा तकटे आदी पदाधिकारीही उपस्थित राहणार आहेत.
चर्चेतील प्रमुख विषय:
दि.१ नोव्हेंबर २००५ नतंर सेवेत आलेल्या प्राथमिक शिक्षकांना जूनी पेन्शन योजना लागू करणे, राज्यातील प्रा .थमिक शिक्षकांचा पगार दरमहा १ तारखेला करणे,
शिक्षकाच्यां बदली धोरणात दुरुस्ती सुचविणे, शिक्षकांच्या वेतनातील त्रुटी दूर करून खंड दोन प्रकाशित करणे, पहिली ते आठवी वर्गाकरीता अतिथी निदेशक नेमणे,
विषय शिक्षकांना वेतनश्रेणी लागू करणे, मुख्याध्यापक पदासाठी पटाची अट १०० करणे, वस्तीशाळा शिक्षकांना सेवासातत्य देणे, आंतर जिल्हा बदली झालेल्या सर्व शिक्षकांना सेवा जेष्ठतेचा लाभ मिळणे,
जिल्हा अंतर्गत आपसी बदलीला परवानगी मिळणे, संवर्ग ४ मधील गैरसोयीच्या ठिकाणी काम करीत अलेल्या शिक्षकांकरीता शुद्धी पत्रक काढणे.
राजपूत मंगल कार्यालय पंढरपूर रोड, मंगळवेढा येथे सभा
राजपूत मंगल कार्यालय पंढरपूर रोड, मंगळवेढा येथे आज रविवार दि.२४ ऑक्टोबर रोजी सकाळी नऊ वाजता होणाऱ्या महामंडळ सभेची तयारी पूर्ण झाली असून सर्वांचे स्वागत करण्यासाठी आम्ही सज्ज आहोत : संजय चेळेकर, संयोजक तथा राज्य उपाध्यक्ष शिक्षक संघ.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज