टीम मंगळवेढा टाईम्स ।
सोलापूर शहर व ग्रामीणमधील कोरोनाची दुसरी लाट आता पूर्णपणे आटोक्‍यात येऊ लागली आहे. प्रतिबंधित लसीकरणावर भर दिला जात असून संशयितांची कोरोना चाचणीदेखील केली जात आहे.
ग्रामीणमध्ये तीन दिवसांत एकही मृत्यू झाला नसून जिल्ह्यातील अक्‍कलकोट, करमाळा, मंगळवेढा व उत्तर सोलापूर तालुका कोरोनामुक्‍तीच्या उंबरठ्यावर आहेत.
तर दक्षिण सोलापूर हा तालुका कोरोनामुक्‍त झाला असून मागील तीन दिवसांत या तालुक्‍यात एकही रुग्ण सापडलेला नाही.
कोरोनाच्या दोन्ही लाटेत सोलापूर जिल्ह्यातील जवळपास 32 लाख 40 हजारांपर्यंत संशयितांच्या कोरोना चाचण्या करण्यात आल्या आहेत.
त्यात शहरातील 29 हजार 415 तर ग्रामीणमधील एक लाख 74 हजार 435 जणांचे रिपोर्ट पॉझिटिव्ह आले. आता ग्रामीणमधील 175 तर शहरातील 16 रुग्ण उपचार घेत असून उर्वरित रुग्ण बरे होऊन घरी परतले आहेत.
परंतु, शहरातील एक हजार 451 तर ग्रामीणमधील तीन हजार 460 रुग्ण कोरोनाचे बळी ठरले आहेत. कोरोनाच्या पहिल्या लाटेत शहराने तर दुसऱ्या लाटेत ग्रामीण भागाने प्रशासनाची झोप उडवली होती.
सर्वच रुग्णालयातील बेड हाऊसफुल्ल झाल्या होत्या, ऑक्‍सिजनची गरज वाढत होती. व्हेंटिलेटर, बायपॅप मशिनही कमी पडल्या. आता दोन्ही लाटेतचा अनुभव पाठिशी असल्याने प्रशासनाने पुढची तयारी जोरात केली आहे.
परंतु, प्रतिबंधित लसीकरण व नियमांचे पालन होऊ लागल्याने कोरोनाचा प्रादुर्भाव कमी झाल्याची स्थिती पहायला मिळत आहे.
सोलापूर शहरातील 26 पैकी एकूण 18 प्रभाग कोरोनामुक्‍त झाले आहेत. दुसरीकडे ग्रामीणमधील दक्षिण सोलापूर कोरोनामुक्‍त झाले असून अक्‍कलकोट, करमाळा, मंगळवेढा व उत्तर सोलापूर हे चार तालुके कोरोनामुक्‍तीच्या उंबरठ्यावर आहेत.
अक्‍कलकोट व करमाळा या तालुक्‍यात प्रत्येकी पाच, मंगळवेढ्यात सात तर उत्तर सोलापूर तालुक्यातील दोन रुग्ण उपचार घेत आहेत.(स्रोत:सकाळ)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
