मंगळवेढा टाईम्स न्युज नेटवर्क ।
पुण्यातील खराडी चंदननगर परिसरात एक धक्कादायक घटना उघडकीस आली आहे. इथं एका उच्चशिक्षित आयटी इंजिनिअरने आपल्या पोटच्या लेकराची निर्घृण हत्या केली आहे. बायकोसोबत झालेल्या वादानंतर आरोपी पतीने हे टोकाचं पाऊल उचललं आहे.
आरोपीने तीन वर्षांच्या मुलाचा गळा चिरून त्याला एका रस्त्याच्या कडेला निर्जनस्थळी फेकून दिलं होतं. या प्रकरणी पोलिसांनी आरोपीविरोधात गुन्हा दाखल करून त्याला अटक केली आहे.
हिंमत माधव टिकेटी असं हत्या झालेल्या तीन वर्षीय मुलाचं नाव आहे. तर माधव साधुराव टिकेटी असं ३८ वर्षीय मारेकरी बापाचं नाव आहे. तो पुण्यातील एका आयटी कंपनीत नोकरीला आहे. तो पुण्यातील खराडी भागात आठ वर्षांची मुलगी, साडे तीन वर्षांचा मुलगा आणि पत्नीसह वास्तव्याला होता.
तो मुळचा विशाखापट्टनम येथील रहिवासी आहे. आरोपी माधव याचे मागील काही दिवसांपासून आपल्या पत्नीसोबत वाद सुरू होते. पत्नीचे बाहेर अनैतिक संबंध सुरू असल्याचा संशय माधवला होता. यातून त्याचे अनेकदा पत्नीसोबत खटके उडत होते. गुरुवारी दुपारी दोघांमध्ये पुन्हा वाद झाला.
याच वादानंतर आरोपीनं मुलाची निर्घृण हत्या केली आहे. सुरुवातीला आरोपीनं मुलगा हरवल्याचा बनाव रचला होता. पण संशय आल्यानंतर पोलिसांनी त्याला ताब्यात घेतलं. यानंतर ही हत्याकांडाची घटना उघडकीस आली आहे.
पोलिसांनी दिलेल्या माहितीनुसार, गुरुवारी दुपारी पती-पत्नीमध्ये वाद झाल्यानंतर आरोपी माधव आपल्या साडे तीन वर्षांच्या मुलाला घेऊन घराबाहेर पडला होता. दोघंही घरात नसल्याने आरोपीच्या पत्नीने आरोपीला फोन केला.
मुलगा कुठे आहे? असं विचारलं. यावेळी मुलगा माझ्यासोबत आहे, मी सिगरेट प्यायला आलोय, अशी माहिती आरोपीनं पत्नीला दिली. पण बराच वेळ झाला तरी आरोपी परत घरी आला नाही. पत्नीने अनेकदा फोन करूनही आरोपी काहीच प्रतिसाद देत नव्हता.
गुरुवारी रात्री उशिरापर्यंत वाट पाहिल्यानंतर आरोपीच्या पत्नीने चंदननगर पोलीस ठाण्यात धाव घेतली. आपला मुलगा आणि पती बेपत्ता असल्याची माहिती त्यांनी पोलिसांना दिली. पोलिसांनी या प्रकरणी तपास केला असता आरोपी माधव पुण्यातील एका लॉजमध्ये मद्यधुंद अवस्थेत झोपला असल्याची माहिती मिळाली.
पोलिसांनी लॉजवर जाऊन आरोपीला ताब्यात घेतलं. मुलाबाबत चौकशी केली. तेव्हा आरोपीनं मुलगा हरवला असल्याचा बनाव रचला. पण पोलिसांनी पोलिसी खाक्या दाखवताच आरोपीनं आपला गुन्हा कबुल केला.
तसेच मुलाची हत्या करून त्याचा मृतदेह कुठे फेकला, याची माहिती देखील आरोपीनं दिली. गुरुवारी दुपारी मुलाची गळा चिरून हत्या केल्यानंतर आरोपी लॉजवर गेला होता. इथं त्याने मद्य सेवन केलं होतं, अशी माहिती पोलीस तपासात समोर आली आहे. पोलिसांनी आरोपीला ताब्यात घेतलं असून पुढील तपास सुरू आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
