टीम मंगळवेढा टाईम्स ।
गेल्या आठ-दहा वर्षांपासून अण्णाभाऊ साठे विकास महामंडळाला निधी अभावी घरघर लागली होती. राज्यातील प्रत्येक जिल्ह्यात मंजुरी अभावी शेकडो प्रकरणे प्रलंबित होती.
उशिरा का होईना शासनाने दखल घेत कर्जाची मर्यादा २५ हजार वरून एक लाखापर्यंत वाढवली आहे. दि.४ नोव्हेंबर २०२२ रोजी याबाबतचा आदेश शासनाने निर्गमित केला आहे.
राज्यातील मातंग तथा तत्सम १२ पोटजातींच्या समाजबांधवांचा आर्थिक दर्जा उंचावण्यासाठी साहित्यरत्न लोकशाहीर आण्णाभाऊ साठे आर्थिक विकास महामंडळाच्या वतीने २५ हजार रुपयांचे कर्ज यापूर्वी देण्यात येत होते.
ही रक्कम तुटपुंजी असल्यामुळे लाभार्थ्यांना व्यवसाय उभा करता येत नव्हता. याकडे राज्यभरातील अनेक संघटनांनी लक्ष वेधले होते.
महाविकास आघाडीतील मुख्यमंत्री उपमुख्यमंत्री व सामाजिक न्याय मंत्री यांच्याकडे साहित्यरत्न लोकशाहीर आण्णाभाऊ साठे आर्थिक विकास महामंडळाच्या भाग भांडवलात वाढ करून ते १२०० कोटी रुपयाचे करावे , अशी मागणी केली होती.
याची दखल घेऊन १ हजार कोटी रुपयाचे भाग भांडवल देण्याची घोषणा तत्कालीन शासनाने केली होती. परंतु त्या संदर्भात अद्याप कोणतीही कार्यवाही झाली नाही.
आता विद्यमान सरकारमधील मुख्यमंत्री एकनाथ शिंदे, उपमुख्यमंत्री देवेंद्र फडणवीस व उच्चस्तरीय अधिकारी यांनी वेळोवेळी दिलेल्या मागण्यांच्या विचार करून हा निर्णय घेतला आहे.
वाढीव थेट कर्ज निधी मिळावा
कर्जाची मर्यादा २५ हजारावरून ही लाखाच्या पुढे करावी ही खूप दिवसांपासूनची आमची मागणी होती. उशिरा का होईना शासनाने दखल घेऊन ती मागणी मान्य केली आहे.- कोमल ढोबळे-साळुंखे यांनी सांगितले.
बँकांना सूचना द्याव्यात
राज्यातील प्रत्येक राष्ट्रीयकृत बँकांना महामंडळाची कर्ज प्रकरण करण्याकरिता निश्चित उद्दिष्ट दिलेले असते. परंतु बँका त्याकडे दुर्लक्ष करतात. बँकांना कर्ज प्रकरणे मंजुरीची सक्ती करावी व दिलेले टार्गेट पूर्ण करून घ्यावे.
राज्य शासनाने घेतलेला निर्णय निश्चितच चांगला आहे, परंतु त्याची अंमलबजावणी होणे अपेक्षित आहे, असे राष्ट्रवादी काँग्रेसचे जिल्हा सरचिटणीस किरण साठे यांनी सांगितले.(स्रोत:पुण्यनगरी)
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज