टीम मंगळवेढा टाईम्स (प्रतिनिधी):
मंगळवेढा तालुक्यातील गोणेवाडी येथे जुन्या भांडणाची कुऱ्हाड पुन्हा बाहेर काढत दोन गट एकमेकांना भिडल्याची धक्कादायक घटना घडली आहे. शनिवारी रात्री आठच्या सुमारास घडलेल्या या थरारात लोखंडी रॉड आणि साखळ्यांचा (चेन) मुक्त वापर करण्यात आला.
या हाणामारीत दोन्ही बाजूंचे लोक गंभीर जखमी झाले असून, मंगळवेढा पोलीस ठाण्यात दोन्ही गटांनी एकमेकांविरोधात परस्परविरोधी तक्रारी दाखल केल्या आहेत. पोलिसांनी दोन्ही बाजूंच्या एकूण १६ जणांवर गुन्हे दाखल केले आहेत.
दूध घालण्यासाठी जाताना गाठले; ६ ग्रॅम सोन्याची साखळी लांबवली
पहिल्या गटातर्फे रोहित मासाळ यांनी दिलेल्या फिर्यादीनुसार, ते आपले चुलते वसंत मासाळ यांच्यासोबत नेहमीप्रमाणे दूध घालण्यासाठी जात होते. त्यावेळी आरोपींनी त्यांची मोटारसायकल अडवून थेट शिवीगाळ करण्यास सुरुवात केली.
वादाचे रूपांतर लवकरच हाणामारीत झाले. रमेश हजारे याने लोखंडी चेनने, तर मारुती मासाळ याने लोखंडी रॉडने वार करत त्यांना जबर जखमी केले.
एवढ्यावरच न थांबता, रोहित यांच्या गळ्यातील ६ ग्रॅम वजनाची सोन्याची साखळी जबरदस्तीने हिसकावून घेतल्याचा गंभीर आरोपही करण्यात आला आहे. या घटनेतील जखमींवर सांगोला येथील रुग्णालयात उपचार सुरू आहेत. या तक्रारीवरून पोलिसांनी ८ जणांवर गुन्हा नोंदवला आहे.
प्रतिआरोप: मारहाणीत दात पडले, तर १ तोळा सोन्याची साखळी पळवली
दुसऱ्या बाजूने रमेश हजारे यांनी दिलेल्या फिर्यादीत मारहाणीचा वेगळाच दावा केला आहे. जुन्या भांडणाचा जाब विचारल्याच्या रागातून विरोधी गटाने आपल्यावर प्राणघातक हल्ला केल्याचे त्यांनी म्हटले आहे. लोखंडी रॉड आणि साखळीने झालेल्या निर्घृण मारहाणीत तोंडातील दात पडून ते गंभीर जखमी झाल्याचे त्यांनी तक्रारीत नमूद केले आहे.
तसेच रोहित मासाळ याने गळ्यातील एक तोळा वजनाची सोन्याची चेन हिसकावून पळ काढल्याचा आरोप हजारे यांनी केला आहे. या तक्रारीवरूनही पोलिसांनी ८ जणांवर गुन्हा दाखल केला आहे.
पोलिसांकडून सखोल तपास सुरू
एकाच घटनेत दोन्ही बाजूंनी एकमेकांवर सोन्याची साखळी हिसकावल्याचे आणि प्राणघातक शस्त्रांनी हल्ला केल्याचे परस्परविरोधी आरोप केल्याने गावात मोठी खळबळ उडाली आहे. या प्रकरणाचे गांभीर्य लक्षात घेऊन मंगळवेढा पोलीस ठाण्याच्या महिला पोलीस उपनिरीक्षक डॉ. आरती कणिरे या घटनेचा पुढील सखोल तपास करत आहेत.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
