सोलापूर जिल्ह्यात ‘या’ महिन्यापासून ‘प्री-पेड स्मार्ट मीटर’ बसविण्यात येणार; ग्राहकांना वीज वापराचा खर्च निश्चित करण्याचा अधिकार; रात्रीच्या वेळी वीजपुरवठा खंडित होणार नाही

टीम मंगळवेढा टाईम्स ।

सोलापूर जिल्ह्यात लवकरच प्री-पेड स्मार्ट मीटर बसविण्यात येणार आहे. ग्राहकाचे पैसे संपत आल्यावर त्याला मोबाईलवर मेसेज पाठविण्याची व्यवस्था आहे. विजेसाठी भरलेले पैसे सायंकाळी ६ ते सकाळी १० या वेळेत संपले तर रात्रीच्या वेळी वीज पुरवठा खंडित होणार नाही.

दुसऱ्या दिवशी सकाळी १० वाजेपर्यंत पैसे भरून वीज पुरवठा चालू ठेवायचा व त्यामधून पैसे संपल्यानंतर वापरलेल्या विजेचे पैसे वजा होईल, अशी सुविधा या मीटरमध्ये करण्यात आलेली आहे, असे ‘महावितरण’कडून सांगण्यात आले.

सध्याच्या पद्धतीत वीज ग्राहकांनी वीज वापरल्यानंतर दरमहा त्यांच्या मीटरचे रिडिंग घेतले जाते व त्यानुसार बिल पाठविले जाते. एखाद्या ग्राहकाने नेहेमीपेक्षा जास्त वीज वापरली तर मोठे बिल येते व त्यामुळे ग्राहकाचे आर्थिक नियोजन बिघडते.

वीज वापरली असल्याने त्याचे बिल भरण्याशिवाय पर्याय नसतो. पण नव्या प्रीपेड स्मार्ट मीटरच्या बाबतीत वीज ग्राहक आधी पैसे भरून तेवढ्याच रकमेची वीज वापरणार असल्याने ग्राहकांना नियोजन करून विजेवरील खर्च पूर्णपणे नियंत्रणात ठेवता येणार आहे. पुढील वर्षांपासून फेब्रुवारी मार्च महिन्यात प्रीपेड मीटर बसवण्यात येतील अशी शक्यता आहे.

घरबसल्या मोबाईलवरून ऑनलाईन पेमेंटचीही सुविधा आहे. केंद्र सरकारकडून मिळालेल्या अनुदानातून प्री-पेड स्मार्ट मीटर बसविण्यात येणार आहेत. ‘महावितरण’ च्या राज्यभरातील २ कोटी ४१ लाख ग्राहकांचे सध्याचे पारंपरिक मीटर बदलण्यात येणार असून त्याऐवजी प्रीपेड स्मार्ट मीटर बसविण्यात येणार आहे.

स्मार्ट मीटर बसविल्यावर वीज ग्राहक मोबाईल फोनप्रमाणे विजेसाठी पैसे भरून वीज वापरता येणार आहे. वीज किती वापरली ? याची माहिती ग्राहकाला नियमितपणे मोबाईल फोनवर मिळेल. त्यामुळे भरलेल्या पैशापैकी किती पैसे शिल्लक आहेत व आर्थिक नियोजनानुसार विजेचा वापर किती करायचा? हे सुध्दा ग्राहकांना समजणार आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.