टीम मंगळवेढा टाईम्स।
“नवीन राष्ट्रीय शैक्षणिक धोरणात मातृभाषेला महत्त्व दिले असून राज्यात मराठीतून व्यवसाय अभ्यासक्रम सुरू केले आहेत. तंत्रविद्यानिकेतन (पॉलिटेक्निक) आणि अभियांत्रिकी अभ्यासक्रमाच्या प्रश्नपत्रिका आता मराठी आणि इंग्रजी अशा दोन्ही भाषांमध्ये विद्यार्थ्यांना उपलब्ध होणार आहेत.
तसे स्वतंत्र्य विद्यापीठांना दिले आहे. एवढंच नव्हे तर विद्यार्थ्यांना उत्तरे देखील दोन्ही भाषेत लिहिता येणार आहेत,” अशी घोषणा राज्याचे उच्च व तंत्र शिक्षण मंत्री चंद्रकांत पाटील यांनी केली.
डेक्कन एज्युकेशन सोसायटी संचलित ‘डीईएस पुणे विद्यापीठा’चे उद्घाटन पाटील यांच्या हस्ते रविवारी झाले. यावेळी सोसायटीचे अध्यक्ष छत्रपती शाहू महाराज,
अखिल भारतीय तंत्र शिक्षण परिषदेचे (एआयसीटीई) उपाध्यक्ष डॉ. अभय जेरे, डीईएस विद्यापीठाच्या नियामक मंडळाचे अध्यक्ष डॉ. शरद कुंटे, विद्यापीठाचे कुलगुरू डॉ. प्रसाद खांडेकर उपस्थित होते.
डॉ. जेरे म्हणाले, “आपल्याकडे असणाऱ्या कौशल्यांतील नवे बदल आणि आणखी उच्च कौशल्ये शिकण्यासाठी पुढील काळात दर दहा वर्षांनी तरुण शिक्षण संस्थांकडे वळणार आहेत. त्यासाठी विद्यापीठे आणि शिक्षण संस्थांनी तयार असावे. “
छत्रपती शाहू महाराज म्हणाले, “नव्याने सुरू केलेले विद्यापीठ . केवळ अध्ययन केंद्र न राहता येथील विद्यार्थी भविष्यातील नेतृत्व घडविणारे असतील. “
शिकवा कोणत्याही भाषेत, ऐका आपल्या मातृभाषेत !
■ प्राध्यापकाने कोणत्याही भाषेत शिकवावे आणि विद्यार्थ्यांना ते आपल्या भाषेत ऐकू येईल, असे सॉफ्टवेअर तयार करण्यात येत आहे.
अभ्यासक्रमातील संकल्पना विद्यार्थ्यांना मातृभाषेतून अधिक चांगल्याप्रकारे समजतात, हे लक्षात घेऊन राष्ट्रीय शैक्षणिक धोरणात मातृभाषेला आणि भारतीय संस्कृती, परंपरेला महत्त्व दिले आहे. त्यामुळे देशाची परंपरा, संस्कृती हा विषय विद्यापीठे आणि शिक्षण संस्थांनी अभ्यासक्रमात आणावा, यासाठी सरकार आग्रही राहणार आहे, असे चंद्रकांत पाटील यांनी सांगितले.
उच्च शिक्षण संस्थांनी पुढील शैक्षणिक वर्षापासून राष्ट्रीय शैक्षणिक धोरणाची (एनईपी) अंमलबजावणी न केल्यास अशा संस्थांना जगातील कोणत्याही विद्यापीठांची संलग्न होण्याची दारे खुली राहतील. परंतु या शिक्षण संस्था कोणत्याही भारतीय विद्यापीठांशी संलग्न राहणार नाहीत. चंद्रकांत पाटील, उच्च व तंत्र शिक्षण मंत्री
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
