टीम मंगळवेढा टाईम्स ।
अकोल्या जिल्ह्यातील पातूर तालुक्यातील विवरा गावात एक धक्कादायक प्रकार घडला असून डॉक्टरांनी मृत घोषित केलेला तरूण चक्क उठून बसला आहे. प्रशांत मेशरे असं या तरूणाचं नाव असून त्याला बुधवारी डॉक्टरांनी मृत घोषित केलं होतं.
त्यानंतर त्याच्या अंत्यसंस्काराची तयारी सुरू केली गेली अन् अंत्यसंस्कारासाठी नेत असताना हा तरूण तिरडीवरच उठून बसल्याचा धक्कादायक प्रकार घडला आहे.
अधिक माहितीनुसार, प्रशांत मेशरे हा तरूण मागच्या काही दिवसांपासून आजारी होता. त्यानंतर त्याला हॉस्पिटलमध्ये दाखल केले गेले. या तरूणाच्या अंगात देव येत असल्याच्या चर्चाही गावात सुरू आहेत.
त्याचबरोबर त्याच्यामध्ये दैवी शक्ती असल्याचाही आरोप केला जातोय. तर काल या तरूणाला डॉक्टरांनी मृत घोषित केल्यानंतर त्याच्या अंत्यसंस्काराची तयारी सुरू करण्यात आली होती.
संध्याकाळी सातच्या दरम्यान मृतदेहाला अंत्यसंस्कारासाठी नेत असताना तिरडी हलू लागल्याने मृतदेह खाली ठेवण्यात आला आणि तरूण जिवंत असल्याचं लक्षात आलं.
त्यानंतर तिरडी मंदिरात आणली गेली. त्यानंतर प्रशांत तिरडीवरच उठून बसला. त्याला पाहण्यासाठी अनेकांची गर्दी जमा झाली. त्याच्याकडे दैवी शक्ती असल्यामुळे तो मृत झाल्यानंतरही उठून बसल्याच्या चर्चा गावात सुरू झाल्या आहेत. तर यमराजाच्या मनात आलं अन् परत पाठवलं असाच काहीसा प्रकार घडला आहे.
दरम्यान, प्रशांत होमगार्डमध्ये कामाला असून तो मंत्रतंत्राच्या गोष्टी करत असल्याचा आरोप गावकऱ्यांनी केलाय. तर या घटनेनंतर प्रशांतला पाहण्यासाठी लोकांची गर्दी जमा झाली.
या गर्दीला आवरण्यासाठी पोलिसांना बोलवावं लागलं असून प्रशांत आणि त्याच्या भावाला पोलिसांनी ताब्यात घेतलंय. तर अधिकचा तपास पोलिसांकडून केला जात आहे.
मृत तरुण जिवंत झाल्याचा बनाव?; पोलिसांनी घेतले ताब्यात; चौकशी सुरू
रात्री अंत्यसंस्कारासाठी स्मशानभूमीत घेऊन जात असताना गावकऱ्यांना तिरडीवर हालचाल होताना दिसून आली. त्याला गावातील एका मांत्रिकाने जिवंत करण्याचा दावा केला. मांत्रिकाने एका खोलीत मंत्र-तंत्र म्हटले. त्यानंतर प्रशांत उठून बसला. हे वृत्त वाऱ्यासारखे परिसरात पसरले.
त्यामुळे प्रशांतला पाहण्यासाठी प्रचंड गर्दी उसळली होती. यावेळी घटनास्थळावर चान्नी पोलिसांनीदेखील धाव घेतली. हा सर्व प्रकार गूढ व संशयास्पद असल्याने चान्नी पोलिसांनी संबंधित युवक, त्याचे कुटुंबीय व तांत्रिकाची चौकशी केली.
पोलिसांनी युवकाची संपूर्ण आरोग्य तपासणी केली. त्यामध्ये तो युवक निरोगी असल्याचे आढळून आले. डॉक्टरांनी मृत घोषित केल्याचे कुठलेही प्रमाणपत्र त्यांच्याकडे नव्हते. त्यामुळे हा सर्व प्रकार बनाव असल्याचे चान्नी पोलिसांनी सांगितले. अंधश्रद्धा पसरवणारा हा प्रकार संबंधित युवक व त्याच्या कुटुंबाने का केला, याचा शोध चान्नी पोलिसांकडून घेतला जात आहे.(स्रोत:लोकसत्ता)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
