सावधान! मंगळवेढ्याच्या महिलेचा सांगोला बसस्थानकावर हातसफाईचा डाव; पोलिसांनी २४ तासांत ठोकल्या बेड्या

टीम मंगळवेढा टाईम्स । सांगोला

सांगोला बसस्थानकावर प्रवाशांच्या गर्दीचा गैरफायदा घेऊन एका महिलेचे सोन्याचे मंगळसूत्र आणि रोख रक्कम लंपास करणाऱ्या महिला चोराला सांगोला पोलिसांनी अवघ्या २४ तासांच्या आत बेड्या ठोकल्या आहेत.

सीनाबाई सुनील शिंदे (रा. खडकी, ता. मंगळवेढा) असे अटक करण्यात आलेल्या संशयित आरोपी महिलेचे नाव असून, तिच्याकडून १ लाख ३० हजार रुपयांचा मुद्देमाल जप्त करण्यात आला आहे.

नेमकी घटना काय?

वासूद (ता. सांगोला) येथील अनिता सावंत या ३ सप्टेंबर रोजी सायंकाळी ४ च्या सुमारास पारे येथे जाण्यासाठी सांगोला बसस्थानकावरून एसटी बसमध्ये चढल्या.

प्रवासादरम्यान सुरक्षिततेसाठी त्यांनी आपल्या गळ्यातील १ तोळे वजनाचे सोन्याचे मणी मंगळसूत्र आणि ४ हजार रुपयांची रोख रक्कम एका पाकिटात ठेवून ते पाकीट हातातील वायरच्या पिशवीत ठेवले होते.

बसमध्ये चढून सीटवर बसल्यानंतर त्यांनी खात्री करण्यासाठी पिशवी पाहिली असता, पाकीट गायब झाल्याचे त्यांच्या लक्षात आले. मंगळसूत्र आणि रोख रक्कम चोरीला गेल्याचे समजताच त्यांनी तत्काळ सांगोला पोलीस ठाण्यात धाव घेऊन तक्रार दाखल केली.

सीसीटीव्हीच्या मदतीने पोलिसांनी आवळल्या मुसक्या

घटनेचे गांभीर्य ओळखून पोलिसांनी तातडीने तपासचक्र फिरवली. बसस्थानक परिसरातील सीसीटीव्ही फुटेजची कसून तपासणी करण्यात आली. संशयास्पद हालचालींवरून आरोपी महिलेचा माग काढत पोलिसांनी अवघ्या २४ तासांत सीनाबाई शिंदे हिला ताब्यात घेतले.

पोलिसी खाक्या दाखवताच तिने गुन्ह्याची कबुली दिली. तिच्याकडून चोरीला गेलेले सोन्याचे मंगळसूत्र हस्तगत करण्यात यश आले आहे.

ही धडक कामगिरी पोलीस निरीक्षक राहुल देशपांडे यांच्या मार्गदर्शनाखाली पोलीस फौजदार संदीप गुरव, पोलीस हवालदार मच्छिंद्र राजगे, शिवाजी पांढरे, नवनाथ सावंत तसेच पोलीस कॉन्स्टेबल मारुती पांढरे, सद्दाम नदाफ आणि गणेश काळे यांच्या पथकाने केली.

या प्रकरणाचा पुढील तपास पोलीस हवालदार मच्छिंद्र राजगे करत आहेत. पोलिसांच्या या जलद आणि धडक कारवाईबद्दल नागरिकांमधून समाधान व्यक्त होत आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.