टीम मंगळवेढा टाईम्स ।
वडापुरातून चोरलेल्या दोन जर्सी गायी विक्रीसाठी थेट अकलूजच्या बाजारात नेल्या. तिथे मोठ्या विश्वासाने गायीच्या विक्रीसाठी बोलावलेल्या दलालाला संशय आला आणि त्याने थेट पोलिसांनाच फोन लावला.
मंगळवेढा तालुक्यातील सिद्धापूरच्या दोन आरोपींसह गाई पोलिसांनी ताब्यात घेतल्या. गुरुवारी वडापूर येथील विठ्ठल शिवाजी जावीर या शेतक-याच्या शेतातील घरासमोर बांधलेल्या दोन जर्सी गाई चोरट्यांनी चोरून नेल्या होत्या.
मंद्रूप पोलीस ठाण्यात या घटनेची शेतकऱ्याने फिर्याद दिली. चोरलेल्या गाई टेम्पोतून अकलूजच्या जनावर बाजारात नेण्यात आल्या त्यांनी चौकशी केली असता चोरट्यांनी थातूरमातूर उत्तरे दिल्याने संशय बळावला आणि त्याने अकलूजच्या पोलिसांना ही माहिती दिली.
कमाल शेट्याप्पा वाघमारे (वय २४) आणि सचिन कट्याप्पा वाघमारे (वय १९, दोघेही रा.सिद्धापूर, ता.मंगळवेढा) या दोघांना गाई आणि टेम्पोसह अकलूज पोलिसांनी ताब्यात घेतले. मंद्रूप पोलिसांकडे त्यांना सोपविण्यात आले.
मंद्रूपचे सहाय्यक पोलीस निरीक्षक नितीन थेटे यांनी संबंधित शेतकऱ्याला बोलावून गायी त्याच्याच असल्याची खात्री करून घेतली. त्यानंतर दोन्ही आरोपींना अटक करून त्यांच्याकडील तीन लाखांचा मुद्देमाल जप्त केला. त्यांना पोलीस कोठडी देण्यात आली आहे.
आज सोमवारी त्यांना न्यायालयासमोर उभे करण्यात येणार आहे. अकलूज पोलीस ठाण्याचे पोलीस निरीक्षक सुगावकर, एएसआय सलबते. हेडकॉन्स्टेबल मुलाणी , कॉन्स्टेबल बेरजे, पोलीस शिपाई कोळी यांनी कामगिरी केली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज