टीम मंगळवेढा टाईम्स ।
मृत्यू हा कोणालाही चुकला नाही… नव्हे तो चुकवताही येत नाही… लग्नानंतर जवळपास १३ वर्षे एकमेकांवर जिवापाड प्रेम… कोरोनामुळे पतीवर दहा दिवसांपासून उपचार सुरू असतानाच पतीचा मृत्यू… पतीच्या निधनानंतर तासाभरातच पत्नीने रेल्वेखाली दिला प्राण.
जीवनाच्या अंतिम क्षणापर्यंत पती-पत्नीचे नाते अतूट असल्याची प्रचिती देणाऱ्या या घटनेत गावकऱ्यांनी व नातेवाईकांनी दोघांचे एकाच सरणावर अंत्यसंस्कार करून निरोप दिला.
एकमेकांत जीव गुंतलेल्या पती-पत्नीचा तासाभरातील मृत्यू सर्वांनाच चटका लावून गेला आहे. मल्लेवाडी येथील आप्पासाहेब रावसाहेब कोरे (वय ३९) व अनुसया आप्पासाहेब कोरे ( वय ३३ ) यांचा सुखाचा संसार गेल्या १३ वर्षांपासून सुरू होता.
एकमेकांवर भरपूर प्रेम. आप्पासाहेब गॅस पाईपलाईनमध्ये काम करत होते. अप्पासाहेब यांचे आई-वडील मयत झाले आहेत. त्यामुळे घरात पत्नी व मुलगा असे छोटे व सुखी कुटुंब होते. मुलासह पती-पत्नी सुखात संसार करत होते.
मुलगा ओम हा सातवी इयत्तेत मंगळवेढा येथे इंग्लिश स्कूलमध्ये शिक्षण घेत आहे. या सुखी कुटुंबाला १० दिवसांपूर्वी दृष्ट लागली. आप्पासाहेब यांना कोरोनाची लक्षणे आढळल्याने त्यांना उपचारासाठी सोलापूर येथील खासगी रुग्णालयामध्ये दाखल केले होते.
दोन दिवसांपासून त्यांना ऑक्सिजनचा त्रास जास्त जाणवू लागला. पती लवकर बरे होणार व गावी घेऊन जायचे, हे स्वप्न अनुसया पाहात असतानाच नियतीने अघटीतच घडवले.
आप्पासाहेब यांचा बुधवारी सकाळी ५.५५ ला उपचारादरम्यान मृत्यू झाला. हॉस्पिटलमध्ये असलेल्या पत्नी अनुसया यांना हे समजताच त्यांनी एका तासाच्या आत सोलापूर रेल्वे स्थानकाजवळ रेल्वेखाली आत्महत्या करून जगाचा निरोप घेतला.
एकमेकांवरील अतूट प्रेम पाहता, नातेवाईकांनी व गावकन्यांनी या दोघांवर एकत्र अंत्यसंस्कार करण्याचा निर्णय घेतला. त्यानंतर एकाच सरणावर या पती-पत्नीवर बुधवारी दुपारी तीन वाजता मोजक्याच लोकांच्या उपस्थितीत अक्कलकोट रोडवरील स्मशानभूमीत अंत्यसंस्कार करण्यात आले.(स्रोत:लोकमत)
भारत पेट्रोलियम कंपनीने मुलाचे पालकत्व स्वीकारावे
अप्पासाहेब कोरे हे भारत पेट्रोलियम गॅस पाईप लाईनवर सुरक्षा रक्षक म्हणून गेली सहा वर्षे काम करीत होते. गेल्या महिनाभरापासून आजारी असल्याने ते कामावर जात नव्हते. त्यांच्या निधनामुळे व त्यांच्या पत्नीनेदेखील आत्महत्या केल्याने त्यांचा ११ वर्षीय मुलगा पोरका झाला आहे. त्याच्या मागे कोणीही नसल्याने भारत पेट्रोलियम कंपनीने पालकत्व स्वीकारावे अशी मागणी ग्रामस्थांमधून होत आहे
बारा वर्षाचा ओम झाला पोरका
चित्रपटात आपण अनेकदा पाहिलं की, नायिकेचं निधन झाल्यानंतर त्यांचा साथीदारही आपला जीव सोडून देतो. अशीच मन हेलावून टाकणारी घटना मल्लेवाडीतील कोरे कुटुंबाच्या बाबतीत घडली आहे. मात्र , यापूर्वी आजी आजोबांच्या मायेला पारखे झालेल्या १२ वर्षांच्या ओमवरील माता – पित्याचे छत्रही हरपल्याने त्याच्यावर आभाळ कोसळले आहे. पालकांचे छत्र हिरावलेल्या ओमला मायेची सावली मिळणे अत्यंत गरजेचे आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज