मंगळवेढा टाईम्स न्युज नेटवर्किंग ।
मंगळवेढा तालुक्यातील सिद्धनकेरी गावात घडलेल्या एका अत्यंत क्रूर आणि हादरवून टाकणाऱ्या घटनेने संपूर्ण राज्यभरात संताप व्यक्त होत आहे. चारित्र्याच्या संशयातून एका नराधम पतीने आपल्याच पत्नीची आणि एका वर्षाच्या निष्पाप मुलीची निर्घृण हत्या केली होती.
या राक्षसी कृत्यात त्याने एवढ्यावरच न थांबता घरातील तीन निरपराध मांजरीच्या पिलांना देखील सोडले नाही. या बहुचर्चित खटल्याचा निकाल देताना पंढरपूर येथील अतिरिक्त जिल्हा व सत्र न्यायाधीश ओंकार देशमुख यांनी आरोपीला जन्मठेपेची शिक्षा सुनावली असून, न्यायालयाच्या या कठोर निर्णयाचे सर्वत्र स्वागत होत आहे.
संजय नागप्पा कोरे असे या दोषी ठरलेल्या आरोपीचे नाव आहे. तो आपली पत्नी सुरेखा हिच्या चारित्र्याबद्दल सातत्याने संशय घेत असे आणि तिच्यावर शारीरिक तसेच मानसिक अत्याचार करत असे. ३ डिसेंबर २०१७ रोजी रात्रीच्या सुमारास हा वाद विकोपाला गेला. संतापाच्या भरात आरोपी संजयने लोखंडी कांबीने पत्नी सुरेखावर बेछूट वार करून तिची हत्या केली.
या भयानक हल्ल्याचा आवाज ऐकून किंवा जवळच झोपलेली त्यांची अवघ्या एक वर्षाची चिमुकली मुलगी श्रावणी जागी झाली. या नराधमाने आपल्या रक्ताच्या नात्याचीही लाज बाळगली नाही आणि झोपेत असलेल्या निष्पाप श्रावणीच्या डोक्यातही लोखंडी कांबीने वार करून तिचा जीव घेतला.
क्रौर्याची सीमा ओलांडत त्याने घरातील मांजरीच्या तीन निरपराध पिलांना देखील त्याच लोखंडी कांबीने ठेचून ठार मारले. एकापाठोपाठ एक घडलेल्या या कृत्यामुळे संपूर्ण परिसर स्तब्ध झाला होता
या अमानुष हत्येनंतर आरोपी संजय कोरे याने कोणताही पश्चाताप न दाखवता थेट गावातील काही ग्रामस्थांसमोर जाऊन आपल्या गुन्ह्याची कबुली दिली. ग्रामस्थांनी तातडीने या घटनेची माहिती पोलिसांना दिली. पोलिसांनी तत्परता दाखवत आरोपीला तातडीने ताब्यात घेतले आणि त्याच्याविरोधात गुन्हा दाखल केला.
या खटल्याचा सखोल तपास तत्कालीन सहायक पोलिस निरीक्षक महेश विधाते यांनी केला होता. खटल्यादरम्यान सरकारी वकील सारंग वांगीकर यांचा युक्तिवाद अत्यंत निर्णायक ठपला. न्यायालयासमोर भक्कम पुरावे सादर करण्यासाठी सरकारतर्फे एकूण ११ साक्षीदार तपासण्यात आले. यामध्ये फिर्यादी सिद्धराम कांबळे, समाधान वाघरे, राहुल कसबे, साधू विपुले, वैद्यकीय तज्ज्ञ डॉ. भावेश पांडे, डॉ. प्रणत शेटे आणि पशुवैद्यकीय अधिकारी दत्ता मेटकरी यांच्या साक्षी अत्यंत महत्त्वाच्या ठरल्या. दरम्यान, या प्रकरणात संशयित म्हणून नाव आलेल्या इतर दोन जणांना-नागप्पा कोरे आणि शारदाबाई कोरे यांना-कलम ४९८(अ) अंतर्गत पुराव्यांच्या अभावी निर्दोष मुक्त करण्यात आले.
न्यायालयाने या खटल्याची सुनावणी करताना पत्नी आणि चिमुकलीच्या हत्येसोबतच प्राण्यांवर केलेल्या अमानुष अत्याचाराची अतिशय गंभीर दखल घेतली. दोन्ही बाजूंचे युक्तिवाद आणि उपलब्ध पुरावे सविस्तरपणे तपासल्यानंतर पंढरपूर अतिरिक्त जिल्हा व सत्र न्यायाधीश ओंकार देशमुख यांनी संजय नागप्पा कोरे याला हत्येप्रकरणी दोषी ठरवले.
न्यायालयाने आरोपीला भादंवि कलमानुसार जन्मठेप आणि १० हजार रुपयांच्या दंडाची शिक्षा सुनावली. विशेष म्हणजे, प्राण्यांवरील क्रूरतेच्या गुन्ह्यासाठी (भादंवि कलम ४२९ अंतर्गत) आरोपीला २ वर्षे सक्तमजुरी आणि २ हजार रुपयांचा स्वतंत्र दंड ठोठावण्यात आला. न्यायालयाचा हा निकाल केवळ मानवतेच्या दृष्टीनेच नव्हे, तर मुक्या प्राण्यांवरील अत्याचाराविरोधातही एक कठोर संदेश देणारा ठरला आहे. या खटल्याच्या निकालामुळे मृत सुरेखा आणि चिमुकली श्रावणीला अंशतः न्याय मिळाला असून, कायद्याचा धाक निर्माण झाल्याचे सर्वसामान्यांकडून बोलले जात आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
