टीम मंगळवेढा टाईम्स । (विशेष प्रतिनिधी):
तालुक्यातील मारापूर येथील ‘नेचर दूध डेअरी’वर सोलापूर अन्न व औषध प्रशासन विभागाने (FDA) अचानक छापा टाकून मुदतबाह्य (Expired) दुग्धजन्य पदार्थांचा मोठा साठा जप्त केला आहे. एका अज्ञात व्यक्तीच्या तक्रारीवरून ही धडक कारवाई करण्यात आली असली, तरी जप्त केलेल्या मुद्देमालाचा आकडा आणि कारवाईचा तपशील देण्यास अधिकाऱ्यांनी टाळाटाळ केल्याने या संपूर्ण प्रकरणावर संशयाचे ढग जमा झाले आहेत.
ग्राहकांच्या जीवाशी खेळ?
मारापूर येथील नेचर दूध डेअरीमध्ये दुधापासून दही, ताक, लस्सी व इतर दुग्धजन्य पदार्थ तयार करून विक्री केले जातात. मात्र, हे पदार्थ मुदतबाह्य झाले असतानाही थेट ग्राहकांच्या माथी मारले जात असल्याची गोपनीय माहिती सोलापूर एफडीए विभागाला मिळाली होती. या तक्रारीच्या आधारे सहाय्यक आयुक्त साहेबराव देसाई व मंगळवेढा विभागाचे अन्न सुरक्षा अधिकारी गणेश कदम यांच्या पथकाने मारापूर येथे छापा टाकला.
अधिकृत माहिती देण्यास टाळाटाळ; कारवाईत नेमकं ‘गौडबंगाल‘ काय?
छाप्या दरम्यान मुदतबाह्य माल जप्त करून पुढील कारवाईसाठी वरिष्ठांकडे अहवाल पाठवल्याचे अधिकाऱ्यांनी सांगितले. परंतु, ‘नेमका किती रुपयांचा मुद्देमाल जप्त झाला?’ या प्रश्नावर अधिकाऱ्यांनी मौन बाळगले. कारवाईतील या ‘गोपनीयतेमुळे’ आणि माहिती देण्यासाठी झालेल्या दिरंगाईमुळे नागरिकांमध्ये तीव्र संताप व्यक्त होत आहे.
राज्यात तुकाराम मुंढे यांच्याकडे सूत्रे आल्यापासून अन्न आणि औषध प्रशासनाने भेसळखोरांविरोधात आक्रमक मोहीम उघडली आहे. मात्र, मंगळवेढ्यातील स्थानिक अधिकारी कारवाईची माहिती देण्यास चालढकल का करत आहेत? असा सवाल आता उपस्थित केला जात आहे.
तालुक्यातील जुन्या तक्रारी अन् संशयाचे जाळे
मंगळवेढा तालुका हा कर्नाटक सीमेलगत असल्याने गुटखा, तंबाखूजन्य पदार्थ आणि भेसळयुक्त दुधाच्या वाहतुकीचे ते प्रमुख केंद्र बनले आहे. यापूर्वी शिरशी येथील एका दूध कंपनीविरोधात स्थानिकांनी तक्रारी करूनही अधिकाऱ्यांनी दुर्लक्ष केल्याची चर्चा पुन्हा रंगू लागली आहे.
‘वारी परिवार’चा धाक
‘वारी परिवार’ या सामाजिक संस्थेने भेसळयुक्त पदार्थांविरोधात सुरू केलेल्या जनजागृतीमुळे सध्या बाजारपेठेतून भेसळयुक्त माल गायब झाला असून, कृत्रिम टंचाई निर्माण झाली आहे.
एकीकडे सामाजिक संस्था जनजागृती करत असताना, दुसरीकडे थेट धाड टाकूनही अधिकारी माहिती लपवत असल्याने “ही कारवाई नक्की भेसळ रोखण्यासाठी होती की प्रकरण मिटवण्यासाठी?” असा थेट सवाल मंगळवेढ्यातील जनता विचारत आहे. या प्रकरणाची वरिष्ठ पातळीवरून चौकशी होणार का, याकडे सर्वांचे लक्ष लागले आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
