टीम मंगळवेढा टाइम्स ।
भीमा व माण नदीपात्रातून होणाऱ्या अवैध वाळू उपशाला आळा घालण्यासाठी प्रशासनाकडून प्रयत्न सुरू असतानाच, आता वाळू चोरांनी एक अजब आणि संतापजनक शक्कल लढवल्याचे उघडकीस आले आहे.
मारापूर (ता. मंगळवेढा) येथे ग्रामपंचायतीने नदीपात्रावर लक्ष ठेवण्यासाठी बसवलेल्या सीसीटीव्ही कॅमेऱ्यांवर थेट कापड झाकून वाळूची चोरी केल्याचा धक्कादायक प्रकार समोर आला आहे.
या प्रकरणी शासकीय मालमत्तेचे नुकसान करून ग्रामपंचायत कर्मचाऱ्यांना जीवे मारण्याची धमकी देणाऱ्या संशयितांविरोधात तातडीने फौजदारी गुन्हा दाखल करण्याची मागणी मारापूर ग्रामपंचायतीने मंगळवेढा पोलिसांकडे केली आहे.
नेमका काय आहे प्रकार?
नदीपात्रातून होणारी बेकायदेशीर वाळू वाहतूक रोखण्यासाठी मारापूर ग्रामपंचायतीने नदी परिसरात सीसीटीव्ही कॅमेरे बसवले आहेत. मात्र, गावातीलच संशयित मागील महिनाभरापासून दररोज रात्री १२ ते पहाटे ४ या वेळेत ट्रॅक्टर आणि पिकअपच्या सहाय्याने माण नदीतून बेकायदेशीर वाळू उपसा करत आहे.
आपली ही चोरी कॅमेऱ्यात कैद होऊ नये, म्हणून त्याने सीसीटीव्ही कॅमेऱ्यांवर चक्क कापड झाकले आणि कॅमेऱ्यांचे सुमारे २५ हजार रुपयांचे नुकसान केले. या सर्व प्रकाराचे सीसीटीव्ही फुटेज पुरावा म्हणून पेन ड्राईव्हद्वारे मंगळवेढा पोलिसांना सादर करण्यात आले आहे.
कर्मचाऱ्यांच्या अंगावर गाडी घालण्याचा प्रयत्न!
मध्यरात्रीच्या सुमारास ग्रामपंचायतीच्या कर्मचाऱ्यांनी वाळू चोरी करणाऱ्या संबंधित इसमांना रोखण्याचा प्रयत्न केला. मात्र, संशयिताने थेट चारचाकी वाहन अंगावर घालण्याची धमकी देत घटनास्थळावरून पोबारा केला. सरपंच विनायक यादव यांनी पोलीस निरीक्षक दत्तात्रय बोरीगिड्डे यांच्याकडे दिलेल्या तक्रारीत या गंभीर बाबीचा उल्लेख केला आहे.
ग्रामस्थांचा आंदोलनाचा इशारा
या संपूर्ण प्रकरणावर संतप्त प्रतिक्रिया उमटत असून प्रशासनाने या प्रकरणाची त्वरित दखल घेऊन वाळू चोरांवर कडक कारवाई करावी. नदीपात्राचे आणि गावाचे होणारे नुकसान थांबवावे; अन्यथा सर्व ग्रामस्थांना सोबत घेऊन तीव्र आंदोलन छेडण्यात येईल.
ग्रामपंचायतीची प्रमुख मागणी:
संशयित व त्याच्या साथीदारांवर चोरी, सार्वजनिक मालमत्तेचे नुकसान आणि जीवे मारण्याची धमकी दिल्याप्रकरणी तात्काळ गुन्हा दाखल करून अटक करावी.
वाळूची बेकायदेशीर वाहतूक करण्यासाठी वापरण्यात येणारी वाहने जप्त करण्यात यावीत.
आता या संपूर्ण प्रकरणात मंगळवेढा पोलीस काय पावले उचलतात आणि या वाळू चोरांच्या मुसक्या कधी आवळतात, याकडे संपूर्ण तालुक्याचे लक्ष लागले आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
