हृदयद्रावक! प्रसूतीसाठी दाखल पत्नीला डबा द्यायला निघालेल्या पतीचा अपघातात अंत; जन्माला आलेल्या मुलाचे तोंडही पाहता आले नाही

टीम मंगळवेढा टाईम्स। 

मंगळवेढा तालुक्यातील हुलजंती शिवारात रविवारी सायंकाळी एका भीषण अपघाताने संपूर्ण परिसर हादरून गेला आहे. भरधाव ट्रकने दिलेल्या धडकेत २४ वर्षीय तरुणाचा जागीच मृत्यू झाला.

हृदयद्रावक बाब म्हणजे, हा तरुण आपल्या प्रसूतीसाठी रुग्णालयात दाखल असलेल्या पत्नीला जेवणाचा डबा देण्यासाठी जात होता. सोमवारी पहाटे त्याला पुत्ररत्न प्राप्त झाले, मात्र आपल्या पोटच्या गोळ्याचे तोंड पाहण्यापूर्वीच काळाने त्याच्यावर झडप घातली.

मनोहर सोमराया सुंठे (वय २४, रा. शिवनगी, ता. मंगळवेढा) असे मृत तरुणाचे नाव आहे. मनोहर यांची पत्नी मंगळवेढा येथील एका खाजगी रुग्णालयात प्रसूतीसाठी दाखल होती.

रविवारी सायंकाळी ७:१५ च्या सुमारास मनोहर आणि त्यांचा चुलत भाऊ संजय मडाप्पा सुंठे हे दोघे वेगवेगळ्या दुचाकीवरून पत्नीसाठी जेवणाचा डबा घेऊन निघाले होते.

हुलजंती गावाजवळ, सोड्डी फाट्यापासून साधारण एक किलोमीटर अंतरावर समोरून येणाऱ्या ट्रकने (TN 52 AF 5882) ओव्हरटेक करण्याच्या प्रयत्नात चुकीच्या बाजूला येऊन मनोहर यांच्या दुचाकीला जोरदार कट मारला. या धडकेत मनोहर रस्त्याच्या कडेला फेकले गेले आणि त्यांच्या डोक्याला गंभीर इजा झाल्याने त्यांचा जागीच मृत्यू झाला.

अपघातानंतर ट्रक चालक फरार

अपघातानंतर माणुसकीला काळिमा फासणारी घटना घडली. ट्रक चालक चंद्रशेखर बी. बालू सामी (रा. तामिळनाडू) याने अपघातस्थळी कोणतीही मदत न करता वाहनासह पळ काढला. या प्रकरणी संजय सुंठे यांनी दिलेल्या फिर्यादीवरून ट्रक चालकावर गुन्हा दाखल करण्यात आला असून पोलीस त्याचा शोध घेत आहेत.

नशिबाचा क्रूर खेळ

रविवारी सायंकाळी मनोहर यांचा मृत्यू झाला आणि सोमवारी पहाटे त्यांच्या पत्नीने एका गोंडस मुलाला जन्म दिला. घरात पाळणा हालल्याचा आनंद साजरा होण्यापूर्वीच कर्त्या पुरुषाच्या निधनाने सुंठे कुटुंबावर दुःखाचा डोंगर कोसळला आहे. पोटच्या मुलाचे तोंडही पाहता न आल्याने परिसरातून हळहळ व्यक्त होत आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज