मंगळवेढा टाईम्स न्युज नेटवर्क।
जेलमधील ओळखीचा फायदा घेऊन मदतीच्या बहाण्याने बोलावून घ्यायचे आणि निर्जनस्थळी नेऊन लुटायचे, अशा एका भयंकर टोळीचा सोलापूर ग्रामीणच्या स्थानिक गुन्हे शाखेने (LCB) पर्दाफाश केला आहे.
मंगळवेढा पोलीस ठाण्याच्या हद्दीत घडलेल्या या खळबळजनक जबरी चोरीच्या गुन्ह्यात एका महिला आरोपीला अटक करण्यात आली असून, पोलिसांनी २ लाख ३० हजार रुपयांचा मुद्देमाल हस्तगत केला आहे.
नेमकी घटना काय?
यातील फिर्यादी ग्लेन पर्सी सिक्वेरा (रा. कल्याण, ठाणे) हे २०२४ मध्ये एका सायबर फ्रॉडच्या गुन्ह्यात सोलापूर जिल्हा कारागृहात असताना त्यांची ओळख सराईत गुन्हेगार अजित उर्फ काळया सुरेश पवार (रा. नंदूर, ता. मंगळवेढा) याच्याशी झाली होती.
जामिनावर सुटल्यानंतर काळया पवारने फिर्यादीला “माझी मोठ्या लोकांशी ओळख आहे, तुझी केस मिटवून टाकतो” असे आमिष दाखवले.
विश्वास ठेवून फिर्यादी आपल्या मैत्रिणीसह ९ एप्रिल रोजी मंगळवेढ्यातील ब्रम्हपूरी शिवारात आले. मात्र, तिथे आधीच दबा धरून बसलेल्या काळया पवार आणि त्याच्या साथीदारांनी फिर्यादीला गाठले. शिवीगाळ व दमदाटी करत त्यांच्याकडील २.५० लाखांची रोकड, सोन्याची चैन आणि चांदीची चैन असा एकूण ३ लाख ५ हजार रुपयांचा मुद्देमाल बळजबरीने लुटून नेला.
पोलीसांची ‘फिल्डिंग‘ आणि कारवाईचा थरार
गुन्ह्याचे गांभीर्य ओळखून पोलीस अधीक्षक अतुल कुलकर्णी यांनी स्थानिक गुन्हे शाखेला समांतर तपासाचे आदेश दिले. वरिष्ठ पोलीस निरीक्षक संजय जगताप यांच्या मार्गदर्शनाखाली सहाय्यक पोलीस निरीक्षक ज्ञानदेव वाघ यांचे पथक माचणूर परिसरात गस्त घालत असताना, त्यांना गोपनीय माहिती मिळाली की काळया पवारची पत्नी सुप्रिया ही या गुन्ह्यात सामील असून ती नंदूर येथील घरी आली आहे.
पोलिसांनी तात्काळ छापा टाकून सुप्रिया अजित उर्फ काळया पवार (वय ३५) हिला ताब्यात घेतले. पोलिसी खाक्या दाखवताच तिने आपला पती अजित, साथीदार रणवीर (रा. मिरज) आणि स्वतः मिळून हा गुन्हा केल्याची कबुली दिली.
हस्तगत केलेला मुद्देमाल:
रोख रक्कम: १,७५,००० रुपये
सोन्याची चैन: ५०,००० रुपये
चांदीची चैन: ५,००० रुपये
एकूण जप्ती: २,३०,००० रुपये
यांनी गाजवली कामगिरी:
पोलीस अधीक्षक अतुल कुलकर्णी, अपर पोलीस अधीक्षक प्रितम यावलकर यांच्या मार्गदर्शनाखाली पीआय संजय जगताप, सपोनि ज्ञानदेव वाघ, ख्वाजा मुजावर, नारायण गोलेकर, धनाजी गाडे, मोहन मनसावाले, अश्विनी गोटे, अक्षय डोंगरे, सतिष बुरकुल आणि मंगळवेढा पोलीस ठाण्याचे पीएसआय बनकर व श्रीकांत देवकते यांच्या पथकाने ही यशस्वी कारवाई केली.
सोलापूर ग्रामीण पोलिसांच्या या कारवाईमुळे गुन्हेगारांचे धाबे दणाणले असून, फरार आरोपींचा शोध घेण्यासाठी पोलीस यंत्रणा युद्धपातळीवर काम करत आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
