टीम मंगळवेढा टाईम्स ।
बारावीच्या परीक्षेत बुधवारी वाणिज्य शाखेच्या चिटणिसाची कार्यपद्धती या पेपरवेळी मंगळवेढ्यातील संत दामाजी महाविद्यालय केंद्रातील एका विद्यार्थिनीने ओढणीत पिन लावून ठेवलेली कॉपी भरारी पथकाने शोधून काढली.
गुरुवारी विज्ञान शाखेच्या रसायनशास्त्र विषयाच्या पेपरवेळी माळशिरसमधील पिराळे केंद्रावर व कुडुवाडीतील भिसे कॉलेजवरील प्रत्येकी एका विद्यार्थिनीस कॉपी करताना भरारी पथकाने पकडले. भिसे कॉलेजवरील मुलीने कपड्यात कॉपी लपविली होती, असे भरारी पथकातील सूत्रांनी सांगितले.
इयत्ता बारावीच्या विद्यार्थ्यांची २१ फेब्रुवारीपासून परीक्षा सुरू झाली असून, भाषा विषयाच्या पेपरला कोणीही कॉपी करताना सापडले नाही. परीक्षा कॉपीमुक्त व्हावी म्हणून महसूल व जिल्हा परिषदेची एकूण ४६ भरारी पथके नेमली आहेत.
सोलापूर जिल्ह्यात बारावीची १६ संवेदनशील केंद्रे असून प्रत्येक केंद्रावर विद्यार्थ्यांना परीक्षा हॉलमध्ये सोडताना त्यांची अंगझडती घेतली जाते. तरीपण, न दिसेल अशा ठिकाणी अनेकजण कॉपी लपवितात. त्याचा भरारी पथकांकडून शोध घेतला जातो. गुरुवारी विज्ञान शाखेतील विद्यार्थ्यांचा रसायनशास्त्र विषयाचा पेपर होता.
सोलापूर जिल्ह्यातील २९ हजार १६४ पैकी २८४ विद्यार्थी विविध कारणांमुळे परीक्षेला उपस्थित राहू शकले नाहीत. २८ हजार ८८० विद्यार्थ्यांमध्ये दोनजण कॉपी करताना पकडले गेले.
आजपासून दहावीच्या विद्यार्थ्यांची परीक्षा सुरू होत असून, जिल्ह्यातील १८२ केंद्रांवर ६५ हजार ७४९ विद्यार्थी परीक्षा देणार आहेत. विद्यार्थ्यांनी गैरप्रकार न करता आत्मविश्वासाने भयमुक्त वातावरणात पेपर लिहावा, असे आवाहन माध्यमिक शिक्षण विभागाने केले आहे.
पहिली कारवाई
मंगळवेढा, माळशिरस व कुडुवाडी या तालुक्यांतील प्रत्येकी एका विद्यार्थ्यांवर कॉपीप्रकरणी भरारी पथकाने कारवाई केली आहे. त्यांचा अहवाल बोर्डाला पाठवून देण्यात आला आहे. ‘स्कॉड मॅडम’ म्हणून ओळख असलेल्या उपशिक्षणाधिकारी स्वाती हवेले यांनी दोन विद्यार्थ्यांवर कॉपीप्रकरणी कारवाई केली आहे.
गोंदिया या ठिकाणी कार्यरत असताना त्यांनी इयत्ता दहावी व बारावीच्या परीक्षेवेळी एकाच वर्षी ६५ विद्यार्थ्यांवर कारवाई केली होती. चिटणिसाची कार्यपद्धती व रसायनशास्त्र या पेपरवेळी त्यांनी दोन कारवाया केल्या. या परीक्षेत बुधवारी जिल्ह्यातील पहिली कॉपी केस त्यांनीच केली.(स्रोत:सकाळ)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज