टीम मंगळवेढा टाईम्स ।
ऑनलाईन स्कूटी खरेदी करणे एका सुशिक्षीत तरुणाला भलतेच महागात पडले. सोशल मीडियावरील मार्केट प्लस हे संकेतस्थळ तयार करून एका भामट्याने या तरुणाची १ लाख २ हजार रुपयांना फसवणूक केली आहे.
याप्रकरणी बाबू रमेश माने (रा.महूद ता. सांगोला) यांनी दिलेल्या फिर्यादीवरून गणेश दगडू क्षिरसागर रा. सोलापूर याच्याविरुद्ध सांगोला पोलीस ठाण्यात गुन्हा दाखल करण्यात आला असून पोलीस आरोपीचा शोध घेत आहेत.
महूद ता.सांगोला येथील बाबू रमेश माने या सुशिक्षित तरुणाने मोबाईलवर सोशल मीडियावर मार्केट प्लस या संकेतस्थळावर जाऊन ऑनलाईन वाहनांचा शोध घेत असताना त्याला एक स्कूटी विक्री साठी असल्याची माहिती मिळाली.
बाबू माने याने तात्काळ गाडी बाबत चौकशी करण्यासाठी गाडीच्या फोटोखाली असलेल्या मोबाईल नंबर वरून संपर्क साधला.
त्यावेळी समोरुन गणेश दगडू क्षिरसागर रा.सोलापूर यांनी माने यांचा फोन उचलला. माने याने त्यास मार्केट प्लसवर आपली स्कूटी पाहीली,
तुम्ही ती विकणार आहे का असे विचारले असता त्याने मी इंडीयन आर्मी मध्ये नोकरीस असून गाडी विकायची असल्याचे सांगीतले.
तसेच त्यांनी गाडीची किंमत २५ हजार रुपये असल्याचे सांगितले. त्यानंतर त्या व्यक्तीने बाबू माने या तरुणाशी संपर्क साधून दुचाकी हवी असल्यास डिलिव्हरी रक्कम म्हणून १ हजार ३०० रुपये भरण्यास सांगितले.
त्यानुसार, संबंधित व्यक्तीने एक बँक खात्याचा क्रमांक दिला. तरुणाने या बँक खात्यात ऑनलाईन रक्कम भरली. काही वेळाने त्या व्यक्तीने पुन्हा संपर्क साधून तरुणाला दुचाकी तत्काळ हवी असल्यास
आणखी ९ हजार १०० रुपये भरावे लागतील, असे सांगितले. त्यामुळे तरुणाने पुन्हा ९ हजार १०० रुपये त्या बँक खात्यात जमा केले.
त्यानंतर त्या व्यक्तीने बाबू माने या तरुणाशी संपर्क साधून दुचाकी हवी असल्यास आणखी ९ हजार १०० रुपये भरावे लागतील असे सांगितले. त्यामुळे तरूणाने पुन्हा ९ हजार १०० रुपये त्याच्या बँक खात्यात जमा केले.
संबंधित व्यक्तीने तुम्ही काही टेंशन घेवू नका, तुम्ही पैसे पाठवा व पैसे पाठवलेली रिसीट तुमच्याकडे ठेवा तुमचे पैसे कोठेही जाणार नाही.
आमचे आर्मीचे नियम आहेत असा विश्वास दाखवल्यानंतर बाबू माने यांनी संबधित व्यक्तीच्या बँक खात्यात १० हजार १०० रूपये , १८ हजार २०० रुपये , १८ हजार २०० रुपये , २६ हजार ४०० रुपये अशी रक्कम पाठवली.
त्यानंतर संबंधित व्यक्तीने तुम्ही आता राहिलेले दहा हजार रुपये पाठवले नाही तरी तुमचे पैसे बुडतील अशी भीती घातल्याने बाबू माने यांनी आत्याच्या मुलाच्या खात्यातून १० हजार रुपये पाठवले.
तरुणाने सायंकाळी दुचाकी केव्हा मिळेल यासाठी त्या व्यक्तीशी संपर्क साधला. परंतु त्या व्यक्तीने तरुणाचा फोन उचलला नाही.
आपली फसवणूक झाल्याचे लक्षात आल्यानंतर तरुणाने तात्काळ पोलीस स्टेशन गाठले. या प्रकरणी बाबू माने यांनी सांगोला पोलीस ठाण्यात फसवणूक झाल्याची तक्रार दाखल केली. त्याआधारे गुन्हा दाखल करण्यात आला आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
