टीम मंगळवेढा टाईम्स ।
मंगळवेढा शहराकडून बठाणकडे अवैधरित्या मोटर सायकलवरून जाणारा ४० हजार रुपये किमतीचा गुटखा मंगळवेढा पोलिसांनी पकडला असून याप्रकरणी वाहिद हिदायत मुलाणी (वय २९), सादिक महंमद सलीम मुल्ला (वय ३८ दोघे रा.मुलाणी गल्ली, मंगळवेढा) या दोघांविरूध्द गुन्हा दाखल करण्यात आला आहे.
दरम्यान मंगळवेढा शहरात व ग्रामीण भागातील पान टपरी वाल्यांना स्थानिक होलसेल गुटखा विकणारे माल पुरवत आहेत.विक्रेते मात्र पोलिसांच्या हाताला लागत नाहीत. त्यांचा शोध पोलिसांनी घेऊन त्यांच्यावर कडक कारवाई करावी अशी मागणी जोर धरू लागली आहे.
पोलिस सुत्रांनी दिलेली माहिती अशी, वरील दोघे आरोपी दि.१५ रोजी दुपारी १२.०० च्या दरम्यान मोटर सायकल क्रमांक एम एच १३ डी.एल .७ ९ ५४ वरून आर एम डी पान मसाल्याचे ४० बॉक्स व एम सुगंधीत तंबाखूचे ४० बॉक्स असा ४० हजार रुपये किमतीचा गुटखा कर्नाटक राज्यातील चडचण येथून खरेदी करून ते मंगळवेढा शहरातून बठाणकडे जाताना
या मार्गावरील जलशुध्दीकरण केंद्राजवळ डी.वाय.एस.पी.राजश्री पाटील यांच्या मार्गदर्शनाखाली पोलिस निरिक्षक जोतीराम गुंजवटे यांच्यासह पोलिस कर्मचाऱ्यांनी पकडला.
याची फिर्याद अन्न व औषध प्रशासनातील मंगेश लवटे यांनी दिल्यानंतर वरील दोघांविरूध्द गुन्हा दाखल करण्यात आला आहे.दरम्यान महाराष्ट्रात गुटख्याला पुर्णता बंदी असतानाही मंगळवेढा शहरापासून चडचण हे केवळ २५ किमी . अंतरावर असल्याने व्यवसायिक या ठिकाणी जावून खरेदी करून याची विक्री मंगळवेढा शहर व ग्रामीण भागात करीत असल्याचे चित्र आहे.
गुटखा हा अन्न औषध प्रशासन विभागाकडे येत असल्यामुळे व ते अधिकारी या भागात फिरकत नसल्यामुळे पान टपऱ्या व हॉटेल यामधून गुटखा विक्रीचा सुळसुळाट दिवसेंदिवस वाढत आहे.
सध्या लॉकडाऊन असल्यामुळे सर्व व्यवहार बंद असून जागोजागी सीमेवर पोलिस असतानाही त्यांच्या नजरा चुकवून बेकायदेशीर वाहतूक करीत हा गुटखा मंगळवेढा ग्रामीण भागात पोहोचत असल्याचे या कारवाईमुळे उघड झाले आहे.
या कारवाईमुळे अन्न औषध प्रशासन नेमके करते तरी काय असा सवाल नागरिकांमधून विचारला जात आहे.पोलिसांनी गुटखा पकडल्यानंतरच अन्न औषध प्रशासनचे अधिकारी केवळ फिर्याद देण्यासाठीच मंगळवेढयात अवतरत असल्याचा बोलबोला सुरु आहे. हे अधिकारी नेमके कधी येवून जातात याचा मागोवा जनतेला अदयाप तरी लागला नसल्याच्या तिखट प्रतिक्रिया व्यक्त होत आहेत.
पुणे येथील अन्न औषध प्रशासनचे वरिष्ठ अधिकाऱ्यांनी या कामी लक्ष घालून योग्य ती कारवाई करावी अशी जनतेतून आग्रहाने मागणी पुढे येत आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
