आता खेळ खल्लास! भेसळखोरांविरोधात तुकाराम मुंढे आक्रमक; शेतकऱ्यांसाठी मोठा निर्णय

मंगळवेढा टाईम्स न्युज नेटवर्किंग ।

ग्राहकांना शुद्ध आणि भेसळरहित उत्पादने मिळण्याचा हक्क बजावत अन्न व औषध प्रशासन विभागाने भेसळखोरांविरुद्ध कठोर भूमिका घेतली आहे. चांगल्या दर्जाचे दूध उत्पादन करणाऱ्या शेतकऱ्यांना त्यांच्या मालाचे योग्य मूल्य मिळाले पाहिजे, यासाठी विभाग कटिबद्ध असल्याचे आयुक्त तुकाराम मुंढे यांनी स्पष्ट केले.

चुकीच्या मार्गाने वागणाऱ्यांना कोणतीही सवलत दिली जाणार नाही, असा इशारा देत मुंढे यांनी राज्यातील भेसळ पूर्णपणे हद्दपार करण्याचे आश्वासन दिले.

दूध उत्पादक संघटनेच्या पदाधिकाऱ्यांनी आयुक्त तुकाराम मुंढे यांची भेट घेतली. या भेटीत दूध आणि दुग्धजन्य पदार्थांमधील भेसळ रोखण्याच्या उपाययोजनांवर सविस्तर चर्चा झाली. ‘चितळे डेअरी’चे ज्येष्ठ संचालक श्रीपाद चितळे, आबासाहेब थोरात आणि कल्याणकारी संघाचे मानद सचिव प्रकाश कुतवळ यांनी मुंढे यांच्याशी संवाद साधला.

प्रयोगशाळा आधुनिकीकरण आणि पनीर उत्पादनाला चालना

आयुक्त मुंढे यांनी सांगितले की, विभागाच्या प्रयोगशाळा अद्ययावत करण्याचे काम सुरू आहे. यामुळे गुणवत्ता तपासणी अधिक प्रभावी होईल.

सध्या बनावट पनीरवर केलेल्या कारवाईचे चांगले परिणाम दिसून येत आहेत.

यामुळे बाजारात खऱ्या दुधापासून तयार केलेल्या पनीरची मागणी वाढली आहे. अनेक हॉटेल्समध्ये ‘आमच्याकडे दुधापासून बनविलेल्या पनीरपासून तयार केलेल्या भाज्या उपलब्ध आहेत,’ असे फलक लावण्यात येत असल्याची माहिती पदाधिकाऱ्यांनी दिली. शेतकऱ्यांच्या हिताचे रक्षण करत ग्राहकांचा विश्वास वाढवणे हे उद्दिष्ट विभागाने ठेवले आहे.

‘सेफ फूड, सेफ ड्रग, सेफ महाराष्ट्र’ मोहीम

नागरिकांच्या आरोग्याशी खेळ करणाऱ्या भेसळखोरांविरुद्ध अन्न व औषध प्रशासन (एफडीए) विभागाने धडक कारवाई सुरू केली आहे. आयएएस अधिकारी तुकाराम मुंढे यांनी पदभार स्वीकारल्यानंतर ही मोहीम अधिक आक्रमक झाली आहे.

गेल्या सहा दिवसांत राज्यभर २०३ ठिकाणी छापे टाकण्यात आले. या मोहिमेत सुमारे एक कोटी ५८ लाख २८ हजार रुपयांचा भेसळयुक्त आणि प्रतिबंधित पदार्थांचा साठा जप्त करण्यात आला. याशिवाय १०२ जणांना अटक करण्यात आली असून ६८ आस्थापनांना सील करण्यात आले आहे.

२५ मे ते ३१ मे या कालावधीत ‘सेफ फूड, सेफ ड्रग, सेफ महाराष्ट्र’ ही विशेष मोहीम राबवण्यात आली. या मोहिमीद्वारे विभागाने भेसळीच्या विरोधात कठोर भूमिका घेतली आहे. शेतकरी, उत्पादक आणि ग्राहक यांचे हित जोपासत राज्यात शुद्ध अन्न आणि औषधांची उपलब्धता सुनिश्चित करण्यासाठी हे प्रयत्न सुरू आहेत.

शेतकऱ्यांचा विश्वास आणि ग्राहकांचा हक्क

तुकाराम मुंढे यांनी पदाधिकाऱ्यांना दिलेल्या आश्वासनातून स्पष्ट होते की, विभाग केवळ कारवाई करणार नाही तर गुणवत्ता वाढवण्यासाठीही सातत्याने प्रयत्न करेल.

दूध उत्पादक शेतकऱ्यांना योग्य भाव मिळवून देणे आणि ग्राहकांना शुद्ध उत्पादने पुरवणे हे दुहेरी ध्येय आहे. प्रयोगशाळांच्या आधुनिकीकरणामुळे तपासणी प्रक्रिया अधिक पारदर्शक आणि वेगवान होईल, अशी अपेक्षा व्यक्त करण्यात येत आहे.

या सर्व कारवाईमुळे राज्यातील भेसळीला आळा बसण्यास मदत होईल आणि अन्न सुरक्षा क्षेत्रात सकारात्मक बदल घडेल, असे निरीक्षण पदाधिकाऱ्यांनी व्यक्त केले.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज