टीम मंगळवेढा टाईम्स ।
संपूर्ण सोलापूर जिल्ह्याचे लक्ष लागलेल्या श्री.विठ्ठल साखर कारखान्यावरील थकीत कर्जापोटी राज्य सहकारी बँकेकडून जप्तीच्या कार्यवाहीला अखेर स्थगिती मिळाली.
संचालक युवराज पाटील यांनी दाखल केलेल्या याचिकेवरील सुनावणी दरम्यान पुणे कर्ज वसुली न्यायाधिकरणने ( डीआरटी ) ही कारवाई पुढील आदेशापर्यंत स्थगित करण्याचे आदेश दिले.
आर्थिक अडचणींमुळे कारखाना यंदा बंद ठेवण्यात आला आहे. गत हंगामातील शेतकऱ्यांची ऊस बिले कामगारांच्या पगारी , ऊस तोडणी वाहतूकदारांची देणी थकलेली आहेत.
याचवेळी राज्य सहकारी बँकेच्या थकीत कर्जापोटी १४ डिसेंबर रोजी ताबा घेण्याची अंतिम नोटीस बजावली होती . दरम्यान , ही कारवाई होऊ नये , यासाठी चेअरमन भगीरथ भालके ‘सहकार शिरोमणी’चे कल्याणराव काळे, तर दुसऱ्या बाजुने संचालक युवराज पाटील यांच्या गटाकडून प्रयत्न सुरू होते.
भालके व काळे यांच्यासह कांही संचालकांनी सहकार मंत्री बाळासाहेब पाटील यांची भेट घेत कारवाईला स्थगिती देण्याचा आग्रह धरला होता.
संचालक मंडळाने येथे बैठक घेऊन कर्जाला ३ महिने मुदतवाढ मिळावी, असा ठराव करून पाठविला होता.
दरम्यान, संचालक युवराज पाटील प्रविण भोसले ( सरकोली ) , संजय पाटील ( रोपळे ) या सभासदांनी अँड.सतीश तळेकर यांच्यामार्फत कर्जवसुली प्राधिकरणकडे याचिका दाखल केली होती.
त्याची सुनावणी ही मंगळवारी होती. त्यामुळे बँकेकडून मंगळवारी जप्तीची कारवाई होणार की स्थगिती मिळणार ? याकडे सर्वांचे लक्ष लागले होते. मंगळवारी सकाळी पुणे ‘ डीआरटी ‘ प्राधिकरणकडे सुनावणी झाली.
त्यामध्ये न्यायालयाने पुढील आदेशापर्यंत परिस्थिती ‘जैसे थे ठेवत बँकेच्या कारवाईला स्थगिती दिली. याबाबत बँकेला कळविण्यात आल्याचे युवराज पाटील यांनी सांगितले.
३ महिन्यांची मुदतवाढ मिळल्याचा दावा
दरम्यान, शेवटच्या टप्प्यात बँकेसोबत तडजोड होऊन २५ लाख रुपये भरून ३ महिन्यांची मुदतवाढ मिळल्याचा दावा भालके गटाने केला आहे.
कारखान्यावर सभासदांची गर्दी राज्य बँकेकडून कारवाई होऊ नये व पैसे भरण्यास ३ महिने मुदतवाढ मिळावी यासाठी दोन्ही गट प्रयत्नशील होते.
तरीही बँकेने कार्यवाही करण्याचा प्रयत्न केल्यास ते हाणून पाडण्यासाठी कारखाना कार्यस्थळावर संचालक युवराज पाटील , नारायण जाधव , गोकुळ जाधव , राष्ट्रवादी युवकचे जिल्हाध्यक्ष अॅड . गणेश पाटील , अॅड . दीपक पवार , भारत भोसले , प्रशांत देशमुख,
माऊली हळणवर , प्रवीण भोसले आदींसह शेकडो सभासद , कार्यकर्ते तळ ठोकून होते.
यादरम्यान , आरोप – प्रत्यारोपांची सभाही रंगली. दुपारी कारवाईला स्थगिती मिळाल्याचे समजताच जल्लोष करण्यात आला.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज