टीम मंगळवेढा टाईम्स । हैदराबाद / भद्राद्री कोठागुडेम
तेलंगणातून वैद्यकीय क्षेत्राला काळिमा फासणारी आणि माणुसकीला हादरवून सोडणारी एक अत्यंत धक्कादायक घटना समोर आली आहे.
भद्राद्री कोठागुडेम जिल्ह्यातील गुंडाळा प्राथमिक आरोग्य केंद्रात (PHC) डॉक्टर उपलब्ध नसल्याने, एका आरोग्य सेविकेने (ANM) गर्भवती महिलेची प्रसूती केली. मात्र, या गंभीर निष्काळजीपणामुळे नवजात बाळासह २० वर्षीय मातेचाही वेदनादायक मृत्यू झाला.
या घटनेला अत्यंत भयंकर वळण तेव्हा मिळाले, जेव्हा मृत मातेच्या अंत्यसंस्कारानंतर तिच्या चितेच्या राखेत शस्त्रक्रियेसाठी वापरली जाणारी लोखंडी कात्री सापडली! या प्रकारामुळे संपूर्ण परिसरात तीव्र संताप व्यक्त होत असून तेलंगणा मानवाधिकार आयोगाने (HRC) या प्रकरणाची गंभीर दखल घेत चौकशीचे आदेश दिले आहेत.
काय आहे संपूर्ण प्रकरण?
गुंडाळा मंडळातील दुर्गम आदिवासी भाग असलेल्या शंभुनिगुडेम येथील २० वर्षीय गर्भवती महिला वनजा यांना १३ जून रोजी दुपारी प्रसूती वेदना सुरू झाल्या. कुटुंबीयांनी त्यांना तातडीने १५ किलोमीटर अंतरावर असलेल्या गुंडाळा प्राथमिक आरोग्य केंद्रात दाखल केले. मात्र, यावेळी रुग्णालयाचे मुख्य वैद्यकीय अधिकारी डॉ. सुदीप कर्तव्यावर हजर नव्हते.
परिस्थितीचे गांभीर्य न ओळखता, तेथे उपस्थित असलेल्या ज्ञानेश्वरी नामक ANM (Auxiliary Nurse Midwife) यांनी स्वतःच प्रसूती करण्याचा निर्णय घेतला. प्रसूतीनंतर जन्माला आलेल्या बाळामध्ये कोणतीही हालचाल नव्हती.
रुग्णवाहिकेची २ तास प्रतीक्षा अन् खोटं आश्वासन!
बाळाची प्रकृती खालावल्याचे पाहून कर्मचाऱ्यांनी वनजा यांना इल्लेंदू सरकारी रुग्णालयात नेण्याचा सल्ला दिला. परंतु, सरकारी यंत्रणेच्या ढिसाळ कारभारामुळे रुग्णवाहिका तब्बल दोन तास उशिराने पोहचली.
”बाळाचा मृत्यू झालेला असतानाही तो जिवंत असल्याचे सांगून कर्मचाऱ्यांनी आम्हाला तिथून पळवून लावले. इल्लेंदू रुग्णालयात पोहोचताच डॉक्टरांनी बाळाला मृत घोषित केले,” असा संतप्त आरोप वनजा यांचे पती संजीवा राव यांनी केला आहे.
गर्भाशयातून अतिरक्तस्राव आणि मातेचा अखेरचा श्वास
बाळाच्या मृत्यूनंतर वनजा यांची प्रकृती वेगाने खालावत गेली. गर्भाशयातून मोठ्या प्रमाणावर रक्तस्राव (Postpartum Hemorrhage) होत असल्याने त्यांना आधी इल्लेंदू आणि नंतर खम्मम सरकारी सामान्य रुग्णालयात हलवण्यात आले. मात्र, अतिरक्तस्रावामुळे उपचारादरम्यान वनजा यांनीही जगाचा निरोप घेतला. एका सुदृढ माता आणि तिच्या ३ किलो वजनाच्या बाळाचा रुग्णालयाच्या निष्काळजीपणामुळे बळी गेल्याने कुटुंबावर दुःखाचा डोंगर कोसळला आहे.
चितेच्या राखेत ‘ती’ कात्री सापडताच खळबळ!
वनजा आणि तिच्या चिमुरडीवर गावामध्ये अंत्यसंस्कार करण्यात आले. त्यानंतर पारंपरिक धार्मिक विधींनुसार जेव्हा कुटुंबीय चितेची राख गोळा करण्यासाठी स्मशानभूमीत गेले, तेव्हा राखेमध्ये प्रसूतीदरम्यान शस्त्रक्रियेसाठी वापरली जाणारी लोखंडी कात्री आढळून आली. ही कात्री प्रसूती दरम्यान मृतदेहातच विसरली गेली होती की काय? असा संशय आता व्यक्त केला जात असून, यामुळे वैद्यकीय कर्मचाऱ्यांच्या निष्काळजीपणाचा कळस समोर आला आहे.
मुख्यमंत्र्यांचे कडक कारवाईचे आदेश
या प्रकरणाचे पडसाद थेट राजकीय आणि सामाजिक वर्तुळात उमटले आहेत. कर्तव्यावर हजर नसलेले डॉक्टर आणि प्रसूती करणाऱ्या ANM ज्ञानेश्वरी यांच्यावर तातडीने विभागीय कारवाईचे आदेश देण्यात आले आहेत.
तेलंगणाच्या मुख्यमंत्र्यांनी या प्रकरणाची सखोल चौकशी करण्याचे आदेश दिले असून, दोषींवर कठोर कायदेशीर कारवाई केली जाईल असे स्पष्ट केले आहे.
मानवाधिकार आयोगाची एन्ट्री: तेलंगणा मानवाधिकार आयोगाने (HRC) या घटनेची स्वेच्छेने दखल घेत जिल्हा प्रशासनाला तात्काळ अहवाल सादर करण्याचे निर्देश दिले आहेत.
एक कळी उमलण्यापूर्वीच कोमजली आणि एका मातेचा संसार उध्वस्त झाला. आता या निष्पाप जीवांच्या मृत्यूला जबाबदार असणाऱ्या नराधमांना काय शिक्षा होते, याकडे सर्वांचे लक्ष लागले आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
