टीम मंगळवेढा टाईम्स ।
मंगळवेढा तालुक्यातील जिल्हा परिषदेचे ५ गट व पंचायत समितीचे १० गण यांचे आरक्षण जाहीर झाले असून या आरक्षणामुळे “कभी खुशी कभी गम” अशी अवस्था झाली असून काही ठिकाणी इच्छुकांच्या मनसुभ्यावर पाणी फिरले आहे.
गेली काही दिवस जिल्हा परिषद व पंचायत समितीला कोणते आरक्षण पडणार या बाबत तर्क वितर्क मांडले जात होते. तर भोसे गटातून मुख्यमंत्री एकनाथ शिंदे गटाचे अनिल सावंत यांची उमेदवारी फिक्स मानली जात आहे.
परंतु, काल १० गणाचे ५ गटाचे आरक्षण जाहीर झाले आहे, नवीन रचनेनुसार झालेला दामाजी नगर हा गट पूर्वी सर्वसाधारण होता तो आता एस.सी महिला झाला असून येथील विद्यमान सदस्य नितीन नकाते यांच्यावर गंडांतर आले असून त्यांना आता शांत राहावे लागणार आहे.
येथील दामाजीनगर व बोराळे हे सर्वसाधारण झाले असून जिल्हा परिषदेसाठी तयारी करणाऱ्यांना पंचायत समितीसाठी तयारी करावी लागणार आहे.
विद्यमान सदस्या कल्पना गडदे यांना पुन्हा संधी मिळू शकते संत चोखामेळा नगर जिल्हा परिषद गट हा एस.सी महिलेसाठी राखीव झाला असून या गटातील विद्यमान सदस्य मंजुषा कोळेकर यांना या आरक्षणाचा फटका बसला आहे.
पुनररचनेत हा गट नवीन झाला असून लक्ष्मी दहिवडी, मरवडे, भोसे गटातील काही गावे समाविष्ट झाली आहेत.
या गटातील चोखामेळा नगर गणासाठी ओबीसी महिलेसाठी आरक्षित झाला असून निंबोणी गण सर्वसाधारण स्त्री साठी राखीव आहे. हे दोन्ही गण नवीन झाले असल्यामुळे या गटात व गणात निवडणूक रंगणार आहे.
हुलजांती हा गट ओबीसी पुरुष या प्रवर्गासाठी राखीव झाला असून येथील विद्यमान सदस्य व माजी समाज कल्याण सभापती शीला शिवशरण यांना दुसरा मतदारसंघ बघावा लागणार आहे.
या गटातून सध्या विद्यमान सभापती प्रेरणा मासाळ यांचे पती सुधाकर मासाळ व राष्ट्रवादीचे नेते लतीफ तांबोळी, माजी सभापती प्रदीप खांडेकर हे निवडणूक लढविण्याच्या तयारीत आहेत.
हुलजांती गण हा अनुसूचित जाती स्त्री साठी राखीव झाला असून विद्यमान सभापती प्रेरणा मासाल यांना जिल्हा परिषदेला उभा रहावे लागू शकते.
मरवडे गण हा अनुसूचित साठी जातीसाठी राखीव झाला असून माजी सभापती प्रदीप खांडेकर येथून निवडून आले होते. मात्र हा गण पुररचनेत विभागला गेला असून खांडेकर यांचे गाव निंबोणी गणात गेले आहे.
जिल्हा परिषदेचे माजी उपाध्यक्ष दिलीप चव्हाण नेतृत्व करीत असलेला भोसे गट पुन्हा सर्वसाधारण झाला असून आ.आवताडे गटाकडून येथून त्यांना पुन्हा उभारण्याची संधी मिळणार आहे.
सर्वसाधारण गट झाल्याने इच्छुकांची संख्या या गटात वाढणार आहे या गटातून दिलीप चव्हाण, भैरवनाथ शुगरचे अनिल सावंत, भोसे येथील दामाजी संचालक तानाजी काकडे, सलगर येथील रामचंद्र जाधव हे देखील संघी अजमावून पाहू शकतात.
या गटातील भोसे गण हा खुला झाला असून जिल्हा परिषदेला ज्यांना संधी मिळणार नाही ते भोसे पंचायत समिती साठी नशीब अजमावणार आहेत.
सध्या तालुक्यातील भोसे जिल्हा परिषद व भोसे गण हे सुरक्षित म्हणून ओळखले जातात.
रड्डे गण हा सर्वसाधारण स्त्री साठी आरक्षित झाल्याने अनेकांच्या अपेक्षा उंचावल्या आहेत. येथील विद्यमान सदस्य नितीन पाटील यांना पुन्हा संधी असून त्यांच्यासह अनेक जण तयारीला लागले आहेत.
नव्याने निर्माण झालेला नंदेश्वर गट हा सर्वसाधारण महिलेसाठी राखीव झाला असून येथील इच्छुकांच्या अपेक्षेवर पाणी पडले आहे.
या गटातून माजी जी.प सदस्य लता शिवाजी नागणे, विद्यमान सदस्य मंजुषा कोळेकर, मंजुषा गावकरे , तसेच रामेश्वर मासाल यांच्या पत्नी आदी जण इच्छुक आहेत.
नंदेश्वर हा गण नवीन निर्माण झाला असून हा ओबीसी आरक्षित झाला असून या जागेवर रामेश्वर मासाल, दादा गरडे, नामदेव जानकर, गेना दोलतडे, चंद्रकांत गरंडे, विष्णू मासाल आदी इच्छुक आहेत.
तसेच लक्ष्मी दहिवडी गण सर्वसाधारण महिलेसाठी राखीव असून येथे देखील इच्छुकांची संख्या मोठी राहणार आहे.
या गणातून निवडून गेलेल्या व उपसभापती असलेल्या लक्ष्मी दहिवडी येथील श्रीमती पाटील यांना देखील पुन्हा संधी मिळू शकते.
नुकत्याच झालेल्या दामाजी कारखाना निवडणुकीत परिचारक व भालके गटाच्या समर्थकांनी एकत्रित येत समविचारी आघाडी करून आमदार समाधान आवताडे यांची कारखान्यावरील सत्ता उलटवून लावली.
त्यामुळे जिल्हा परिषद व पंचायत समिती निवडणुकीत समविचारी आघाडी कायम राहून आमदार आवताडे गटाला टक्कर देण्याची शक्यता व्यक्त होत असून सहकारातील ज्येष्ठ नेते बबनराव अवताडे व खरेदी विक्री संघाचे सिद्धेश्वर आवताडे यांची भूमिका काय राहणार याकडेही नागरिकांचे लक्ष लागून राहणार आहे.
आगामी निवडणुका या दुरंगी होतात की तिरंगी हे पाहणे देखील महत्त्वाचे असून काल जाहीर झालेल्या आरक्षणामध्ये जिल्हा परिषदेत जाण्यासाठी व पंचायत समितीत जाण्यासाठी इच्छुक असणाऱ्या अनेकांच्या अपेक्षांवर पाणी फिरले आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
