टीम मंगळवेढा टाईम्स ।
“माझं मूल इंग्रजी शाळेत शिकतंय,” या पालकांच्या मानसिकतेचा गैरफायदा घेऊन मंगळवेढ्यातील गोणेवाडी येथे गेल्या ६-७ वर्षांपासून एक अनधिकृत इंग्लिश मीडियम शाळा राजरोसपणे सुरू असल्याचा धक्कादायक प्रकार समोर आला आहे.
येथील ‘बाल संस्कार विद्यालय’ ही शाळा पूर्णपणे बोगस आणि अनधिकृत असून ती तात्काळ बंद करण्यात यावी, अशी आक्रमक मागणी आता गोणेवाडीतील ग्रामस्थांनी केली आहे.
या शाळेमुळे निष्पाप विद्यार्थ्यांचे भविष्य अंधारात सापडले असून, प्रशासनाने यावर कडक कारवाई करण्याची मागणी जोर धरू लागली आहे.
ना धड शिक्षक, ना सुरक्षेची हमी!
या तथाकथित हायफाय इंग्लिश मीडियम शाळेचा भोंगळ कारभार पाहून ग्रामस्थांनी संताप व्यक्त केला आहे. या शाळेत शिक्षण देणारे शिक्षकच मुळात अपात्र आहेत.
शिक्षकांची पात्रता: केवळ १२ वी पास, डी.एड. नापास आणि पदवीधर तरुण-तरुणी येथे अवघ्या ८ ते १० हजार रुपयांच्या मानधनावर मुलांना ‘शिक्षणाचे धडे’ देत आहेत.
जीवाशी खेळ: शाळेच्या स्कूल बसची अवस्था अत्यंत बिकट असून, विनापरवाना (लायसन्स नसलेले) चालक या बसेस चालवत आहेत. त्यामुळे विद्यार्थ्यांची सुरक्षा पूर्णपणे ‘रामभरोसे’ बनली आहे.
लवकरच शासकीय कारवाईचा बडगा
”आम्ही या शाळेला प्रत्यक्ष भेट दिली असता ती बंद आढळली. मात्र, ही शाळा पूर्णपणे अनधिकृत आहे. जर ही शाळा पुन्हा सुरू करण्यात आली, तर शासकीय नियमांनुसार फौजदारी आणि दंडात्मक कारवाई करण्यात येईल.”— हर्षद मेहता, गटशिक्षणाधिकारी, मंगळवेढा
पालकांना जाहीर आवाहन
”आमच्या शाळेलगतच ही खाजगी आणि अनधिकृत शाळा गेल्या ५-६ वर्षांपासून बेकायदेशीरपणे चालवली जात आहे. पालकांनी अशा भूलथापांना बळी पडू नये. आपल्या पाल्यांना अशा बोगस शाळेत प्रवेश देऊन त्यांच्या शैक्षणिक भविष्याचे नुकसान करू नये.”— प्राचार्य नंदकुमार होरे, स्वामी विवेकानंद विद्यालय, गोणेवाडी
ग्रामस्थांचा इशारा: वेळीच कारवाई करा, अन्यथा…
एकीकडे शिक्षणाचा अधिकार कायद्यांतर्गत कडक नियम असताना, दुसरीकडे ६ ते ७ वर्षे शिक्षण विभागाच्या नाकाखाली ही अनधिकृत शाळा कशी चालली? असा सवाल ग्रामस्थ विचारत आहेत. जर या बोगस शाळेवर वेळीच टाळे ठोकले नाही, तर या विद्यार्थ्यांना पुन्हा मुख्य शैक्षणिक प्रवाहात आणणे कठीण होईल. त्यामुळे प्रशासनाने आता कागदी घोडे न नाचवता थेट फौजदारी कारवाई करावी, अशी मागणी गोणेवाडीकरांनी केली आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
