(मंगळवेढा टाईम्स वृत्तसेवा:-)
जमीन मालकाकडून पॅन कार्ड , आधार कार्ड व फोटो असे व्हॉट्स अॅपवर मागवून मालकाऐवजी तोतया इसम उभा करून ४ लाख रुपयांची २० आर जमीन परस्पर खरेदी केल्याप्रकरणी अटकेत असणाऱ्या सीताराम लक्ष्मण मेटकरी या आरोपीने सांगोला पोलीस ठाण्याच्या लॉक अपमध्येच आपल्या शर्टाच्या सहाय्याने गळफास घेऊन आत्महत्या करण्याचा प्रयत्न केला.
ही घटना रविवार , १६ फेब्रुवारी रोजी सायंकाळी ७ . ३० वाजण्याच्या सुमारास सांगोला पोलीस ठाण्यात घडली . चार जानेवारी रोजी जमीन मालकाऐवजी तोतया इसम उभा करून जमिनीची परस्पर खरेदी करणाऱ्या सीताराम मेटकरी याच्या विरोधात सांगोला पोलीस ठाण्यात गुन्हा दाखल करण्यात आला होता.
सदर गुन्ह्यातील आरोपी मेटकरी यास सांगोला पोलिसांनी अटक करून पोलीस ठाण्यातील लॉक अपमध्ये ठेवले होते.
दरम्यान , पोलीस ठाण्यात उपस्थित असणारे अधिकारी – कर्मचारी आपल्या कक्षात आणि कामात व्यस्त असताना पोलीस ठाण्याच्या लॉक अपमध्ये असणाऱ्या सीताराम मेटकरी याने आपल्या अंगातील शर्ट काढून तो लॉकअपच्या गजाला वरील बाजूस घट्टबांधून याच शर्टाच्या सहाय्याने स्वतःला गळफास लावून घेण्याचा प्रयत्न केला.
याचवेळी पोलीस ठाण्यात नेहमीप्रमाणे वार्तांकन करण्यासाठी गेलेल्या पत्रकारांनी हा प्रकार पाहून येथील ठाणे अंमलदार व इतर कर्मचाऱ्यांच्या निदर्शनास आणून दिला. त्यानंतर तात्काळ पोलीस कर्मचाऱ्यांनी मेटकरी याने लावून घेतलेला गळफास काढून त्याला असे कृत्य करण्यापासून रोखले. परंतु सदर गंभीर प्रकाराकडे वेळीच लक्ष दिले नसते तर हा प्रकार आरोपी सीताराम लक्ष्मण मेटकरी याच्या जीवावर बेतू शकला असता. मेटकरी याने असा प्रयत्न का केला ? खरोखर त्याला आत्महत्या करायची होती, की तपास यंत्रणेवर दबाव आणण्यासाठी त्याने हे कृत्य केले, याबाबत चर्चा सुरू होती.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
