मंगळवेढा टाईम्स : (सांगोला/बाळासाहेब झिंजुरटे):
नियतीचे खेळ किती क्रूर असू शकतात, याचाच एक थरारक आणि डोळ्यात पाणी आणणारा प्रत्यय सांगोला-जत महामार्गावर आला. सुखाचा संसार फुलवण्याचे स्वप्न पाहणाऱ्या एका नवदांपत्याचा आणि त्यांच्या जन्मालाही न आलेल्या सात महिन्यांच्या बाळाचा भीषण रस्ते अपघातात दुर्दैवी मृत्यू झाला.
कपाळावरचा कुंकू आणि हातातील चुडा कायम ठेवत, अखेर या पती-पत्नीला एकाच चितेवर अखेरचा निरोप देण्यात आला. या काळजाचा थरकाप उडवणाऱ्या घटनेने संपूर्ण सांगोला तालुक्यावर शोककळा पसरली आहे.
आंतरजातीय विवाह ठरला ‘औटघटकेचा‘
वाकी शिवणे येथील सागर जाधव हा तरुण जेसीबी ऑपरेटर म्हणून काम करत होता. काही महिन्यांपूर्वीच त्याने सुजाता हिच्यासोबत आंतरजातीय विवाह केला होता. समाजाच्या चौकटी ओलांडून एकत्र आलेल्या या जोडप्याने सोनंद येथे आपला नवा संसार थाटला होता.
सुजाता सात महिन्यांची गरोदर असल्याने दोघेही आपल्या घरामध्ये येणाऱ्या नव्या पाहुण्याच्या (बाळाच्या) आगमनाची आतुरतेने वाट पाहत होते. मात्र, त्यांचे हे सुख नियतीला मान्य नव्हते.
तपासणीसाठी जाताना काळाने गाठले…
शनिवारी दुपारी सुजाताच्या वैद्यकीय तपासणीसाठी सागर तिला दुचाकीवरून सांगोल्याकडे घेऊन निघाला होता. दुपारी २:४० च्या सुमारास कडलास येथील गायकवाड वस्ती परिसरात त्यांच्या दुचाकीला समोरून येणाऱ्या एका भरधाव कंटेनरने जोरदार धडक दिली.
ही धडक इतकी भीषण होती की, सागर आणि सुजाता या दोघांचाही जागीच मृत्यू झाला. या अपघातात त्यांच्या सात महिन्यांच्या बाळाचाही गर्भातच अंत झाला. एका क्षणात एका हसत्याखेळत्या कुटुंबाचा आणि त्यांच्या अपूर्ण स्वप्नांचा चक्काचूर झाला.
उपस्थितांचे डोळे पाणावले; एकाच चितेवर अंत्यसंस्कार
पोस्टमार्टम झाल्यानंतर रविवारी दोघांचेही शव गावात आणण्यात आले. नवविवाहित जोडपे आणि त्यांच्या न जन्मलेल्या बाळाचा असा करुण अंत पाहून गावातील प्रत्येकाचे काळीज हेलावले.
‘मरणेही तुजसवे…’ याची प्रचिती देत या मृत दांपत्यावर एकाच चितेवर अंत्यसंस्कार करण्यात आले. जेव्हा चितेला अग्नी देण्यात आला, तेव्हा तिथे उपस्थित असलेल्या शेकडो नागरिकांच्या अश्रूंचा बांध फुटला.
”ज्यांच्या संसाराची सुरुवात पाहताना आनंद झाला होता, त्यांचा असा शेवट पाहण्याची वेळ येईल, असा विचारही कोणी केला नव्हता,” अशी आर्त भावना ग्रामस्थांनी व्यक्त केली.
या अपघातामुळे सांगोला-जत महामार्गावरील वाढत्या वाहतुकीचा आणि भरधाव वाहनांचा प्रश्न पुन्हा एकदा ऐरणीवर आला आहे. पोलिसांनी या प्रकरणी कंटेनर चालकाविरुद्ध गुन्हा दाखल केला असून पुढील तपास सुरू आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
