टीम मंगळवेढा टाईम्स ।
नशिबाचे फेरे किती क्रूर असावेत, याचा प्रत्यय दक्षिण सोलापूर तालुक्यातील कारकल येथे आला. ज्या माऊलीने काही वर्षांपूर्वी अपघातात पती गमावला, त्याच आईच्या कुशीतून नियतीने एकाच वेळी तिची दोन फुले हिरावून नेली आहेत.
शेततळ्यात पोहायला गेलेल्या सख्ख्या बहीण-भावाचा दोरी सुटल्याने बुडून दुर्दैवी मृत्यू झाला. या घटनेने संपूर्ण जिल्ह्यावर शोककळा पसरली आहे.
दोरी सुटली अन् घात झाला…
श्रवण संतोषकुमार अंकलगी (१५) आणि श्रावणी संतोषकुमार अंकलगी (१०) अशी मृतांची नावे आहेत. श्रवणला शाळेला सुटी असल्याने तो घरी आला होता. रविवारी दुपारी दीडच्या सुमारास दोघे बहीण-भाऊ उत्साहाने शंभर बाय शंभरच्या मोठ्या शेततळ्यात पोहण्यासाठी गेले.
सुरक्षेसाठी त्यांनी झाडाला एक दोरी बांधून तिचा आधार घेतला होता.
मात्र, पोहताना अचानक झाडाला बांधलेली ती दोरी निसटली आणि क्षणात आनंद शोकात बदलला. आधार सुटल्याने दोघेही खोल पाण्यात बुडू लागले.
आजीचा आक्रोश अन् काळजाचा थरकाप
आई उषा अंकलगी या कामानिमित्त सोलापूरला गेल्या होत्या. बराच वेळ झाला तरी नातवंडांच्या पोहण्याचा आवाज येत नाही, हे लक्षात येताच आजी महादेवी कोळी यांनी शेततळ्याकडे धाव घेतली.
तिथे पाहताच त्यांच्या काळजाचा ठोका चुकला. आपली नातवंडे पाण्यात बुडाल्याचे पाहून त्यांनी फोडलेला हंबरडा ऐकून परिसरातील शेतकरी मदतीला धावले.
गावकऱ्यांची धाव, पण यश हुकलं
विद्यानंद वालीकर, मल्लिकार्जुन सोनगी आणि महादेव कांबळे यांनी जीवाची पर्वा न करता शेततळ्यात उड्या घेतल्या. अथक परिश्रमानंतर दोघांनाही बेशुद्धावस्थेत बाहेर काढण्यात आले. तातडीने त्यांना मंद्रप ग्रामीण रुग्णालयात नेण्यात आले, मात्र तिथे डॉक्टरांनी त्यांना तपासून ‘मृत’ घोषित केले.
अंकलगी कुटुंबावर आभाळ फाटलं
काही वर्षांपूर्वी पतीचे निधन झाल्यानंतर आई उषा यांनी मोठ्या कष्टाने दोन्ही मुलांचा सांभाळ केला होता. श्रवण आणि श्रावणी हेच त्यांच्या जगण्याचा आधार होते.
एकाच वेळी दोन्ही अपत्ये गमावल्याने या माऊलीवर आभाळ फाटले आहे. या घटनेचा अधिक तपास पोलीस हवालदार विठ्ठल बिराजदार करत आहेत.
सुरक्षेचा प्रश्न पुन्हा ऐरणीवर:
शेततळ्यांमध्ये प्लास्टिक पेपरमुळे पाय घसरण्याचे आणि बाहेर पडण्यास अडथळा येण्याचे प्रमाण मोठे आहे. या भीषण घटनेमुळे शेततळ्यांच्या सुरक्षेचा प्रश्न पुन्हा एकदा गंभीर बनला आहे.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
