कामाची बातमी! महाराष्ट्रातील नव्या उद्योजकांसाठी खुशखबर; ‘एवढ्या’ लाखांची मदत मिळणार, ‘या’ फंडिंग’ योजना जाहीर

मंगळवेढा टाईम्स न्युज नेटवर्किंग ।

केंद्र सरकारच्या इलेक्ट्रॉनिक्स आणि माहिती तंत्रज्ञान मंत्रालयाच्या “जेनिसिस (जनरेशन नेक्स्ट सपोर्ट फॉर इनोव्हेटिव्ह स्टार्टअप्स) उपक्रमांतर्गत देशातील नवोन्मेषी उद्योगांना प्रोत्साहन देण्यासाठी दोन नवीन योजना जाहीर करण्यात आल्या आहेत.

या योजनांमध्ये “मॅचिंग इन्व्हेस्टमेंट घटक निधी योजना” आणि “पायलट प्रकल्प निधी योजना” समाविष्ट आहेत. या योजनांद्वारे पात्र नवउद्योजकांना त्यांच्या तंत्रज्ञानाधारित प्रकल्पांना वेग देण्यासाठी ५० आणि ४० लाख रुपयांपर्यंत आर्थिक सहाय्य दिले जाणार आहे.

या दोन्ही योजना मराठवाडा अॅक्सिलरेटर फॉर ग्रोथ अँड इन्क्युबेशन कौन्सिल (मॅजिक) या मान्यताप्राप्त स्टार्टअप इंक्युबेटर केंद्रामार्फत राबविण्यात येत आहेत.

मॅजिक हे भारत सरकारच्या इलेक्ट्रॉनिक्स आणि माहिती तंत्रज्ञान मंत्रालयाच्या जेनिसिस उपक्रमाचे अधिकृत अंमलबजावणी केंद्र असून देशातील ग्रामीण आणि उपनगरी भागातील नवउद्योजकांना राष्ट्रीय स्तरावर पोहोचविण्यासाठी कार्यरत आहे.

मॅचिंग इन्व्हेस्टमेंट निधी योजनेंतर्गत तंत्रज्ञानावर आधारित उत्पादन किंवा सॉफ्टवेअर तयार करणाऱ्या स्टार्टअप्सना ५० लाख रुपयांपर्यंत निधी सहाय्य दिले जाईल.

यासाठी भारतात नोंदणीकृत प्रायव्हेट लिमिटेड कंपनी (किमान ५१ टक्के भारतीय मालकी आवश्यक), औद्योगिक व अंतर्गत व्यापार संवर्धन विभागाकडून (डीपीआयआयटी) मान्यता प्राप्त स्टार्टअप, टिअर दोन किंवा टिअर तीन शहरातून कार्यरत,

बाजारपेठेसाठी तयार उत्पादन अथवा सॉफ्टवेअर असणे आवश्यक, महसूल मिळवणाऱ्या अथवा बाजारात प्रचलित झालेल्या उपक्रमांना प्राधान्य, पूर्वी टाइड २.० किंवा समृद्ध योजनेतून निधी न मिळालेला असणे आवश्यक आहे.

स्पर्धेत सहभागी होण्यासाठी bit.ly/GENESIS_PFC या संकेतस्थळावर अर्ज करावा, अर्ज करण्याची अंतिम तारीख ३० ऑक्टोबर आहे.

पायलट प्रकल्प निधी योजनेंतर्गत नवउद्योजकांना खासगी उद्योगसंस्था, सार्वजनिक क्षेत्रातील उपक्रम किंवा मोठ्या औद्योगिक गटांबरोबर प्रत्यक्ष पायलट प्रकल्प राबविण्यासाठी ४० लाख रुपयांपर्यंत आर्थिक सहाय्य मिळू शकते.

यासाठी डीपीआयआयटी मान्यता आवश्यक, कार्यक्षम नमुना (प्रोटोटाइप) तयार असणे आवश्यक, संस्थापक पूर्णवेळ उपक्रमाशी निगडित असणे आवश्यक आहे. स्पर्धेत सहभागी होण्यासाठी bit.ly/GENESIS_PILOT या संकेतस्थळावर अर्ज करावा, अर्ज करण्याची अंतिम तारीख पाच नोव्हेंबर आहे.

स्टार्टअप्सनी या सुवर्णसंधीचा लाभ घ्यावा आणि आपल्या नवकल्पनांना पुढील स्तरावर नेण्यासाठी त्वरित अर्ज करावा, असे आवाहन मॅजिकतर्फे करण्यात आले आहे.

अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262

“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.

मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज