टीम मंगळवेढा टाईम्स ।
मी मिलिटरीचा अधिकारी बोलतोय. टेंभुर्णी येथे मिलिटरीचा कॅम्प लागला असून आम्हाला किराणा साहित्याची तत्काळ आवश्यकता आहे,
असे भासवून एका किराणा दुकानदाराची ऑनलाइन ३० हजार रुपयांची फसवणूक केली. ही घटना सकाळी नऊ वाजण्याच्या सुमारास मोहोळ येथे घडली.
मोहोळ बाजारपेठेतील फुलचंद वीरचंद शहा ॲण्ड सन्स या दुकानाचे मालक चेतन शहा यांना २० मार्च रोजी सकाळी नऊ वाजण्याच्या सुमारास एका अनोळखी मोबाईल नंबरवरून फोन आला.
मी मिलिटरीचा ऑफिसर संदीप रावत बोलत आहे. आमचा टेंभुर्णी येथे कॅम्प लागला आहे. आम्हाला किराणा सामानाची आवश्यकता आहे. मी तुम्हाला व्हॉटस्अॅपवर किराणा सामानाची यादी पाठवतो व त्या सामानाची किती किंमत होते , ते सांगा.
त्यानुसार त्या सामानाची किंमत ३५ हजार रुपये झाल्याचे सांगितले. त्यावेळी मिलिटरीचे अधिकारी संदीप रावत यांनी, ‘हे बिल मी आमच्या अकाउंट डिपार्टमेंटला पाठवतो.
तुम्हाला अकाउंट डिपार्टमेंटचा फोन येईल, असे सांगितले. त्यानुसार लगेच दुसऱ्या मोबाईल नंबरवरून फोन आला व मी आनंदकुमार सिंग बोलत आहे. तुमचे बिल मी पाठवतो. त्या अगोदर तुम्हाला माझ्या नावाचे आर्मीचे क्यूआर कोड पाठवतो त्याबरोबर माझी कागदपत्रे पाठवतो तुम्ही क्यूआर कोड स्कॅन करा.
तुमच्या अकौंटला ३५ हजार रुपये बिल जमा होईल. त्यानंतर शहा यांच्या व्हॉटस्अॅपवर आर्मीचा क्यूआर कोड आनंदकुमार सिंग यांचे आधार कार्ड व मिलिटरीचे ओळखपत्र आले. त्यानुसार त्यांनी व्हॉटस्अॅपवर क्यूआर कोड स्कॅन केला असता माझ्याच खात्यातून ३० हजार रुपये कट झाल्याचा मला मेसेज आला.
त्यानंतर मी त्यांना फोन केला असता त्यांनी माझा फोन उचलला नाही. फसवणूक झाल्याचे लक्षात आल्यानंतर चेतन शहा यांनी पोलिसांत फिर्याद दिली. यानुसार फसवणुकीचा गुन्हा दाखल करण्यात आला आहे. अधिक तपास साहाय्यक पोलीस निरीक्षक संतोष माने हे करीत आहेत.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
