मंगळवेढा टाईम्स वृत्तसेवा :-
अल्पवयीन मुलीशी विवाह केल्याप्रकरणी अंगाची हळद निघण्यापुर्वीच दोघा नवरदेवांना गजाआड व्हावे लागले तर दोन वधुंची बालसुधारगृहात रवानगी करण्यात आली आहे. दरम्यान, ही घटना रविवार दि.30 डिसेंबर रोजी दुपारी 12.45 वा.पडोळकरवाडी.ता.मंगळवेढा येथे घडली असून याप्रकरणी दोन नवरदेव व त्यांचे वडिल तसेच दोन्ही वधुचे वडिल यांच्याविरूध्द बालविवाह प्रतिबंध कायद्यानुसार गुन्हा दाखल झाला आहे.
या घटनेची हकिकत अशी की, नामदेव सोमण्णा गोरड(रा.पडोळकरवाडी) यांचे चिरंजीव सोमनाथ नामदेव गोरड(वय 22) व नवनाथ नामदेव गोरड(वय 21) या दोघांचा विवाह लोणार येथील बिराप्पा शामराव वाघमोडे व पडोळकरवाडी येथील पांडूरंग यशवंत कोळेकर यांच्या अल्पवयीन मुलीशी दि.30 रोजी दुपारी 12.45 वा.झाला. या बालविवाहाची माहिती पोलीस निरीक्षक अनिल गाडे यांना समजताच त्यांनी पोलीस उपनिरीक्षक दत्तात्रय पुजारी, पो.हे.कॉ.मोनिका वाघे, पोलीस नाईक विकास क्षीरसागर यांना विवाहस्थळी पाचारण केले. या पथकाने प्रत्यक्ष विवाहस्थळी पाहणी केली असता तेथे अल्पवयीन मुलींच्या कपाळी बाशिंग बांधलेले तसेच जमिनीवर तांदुळ(अक्षदा) पडल्याचे दिसून आले.
पोलीस उपनिरीक्षक दत्तात्रय पुजारी यांनी वधुकडे वयाबाबत चौकशी केली असता त्या दोघी वधु अल्पवयीन असल्याचे जन्म दाखल्यावरून दिसून आले. पोलीसांनी नवरदेव सोमनाथ गोरड(वय 22) व नवनाथ गोरड(वय 21) यांना बाशिंग बांधलेल्या अवस्थेत मंगळवेढा पोलीस स्टेशनमध्ये हजर केले.
दोन नवरदेवांना तसेच त्यांचे वडिल नामदेव गोरड व दोन्ही वधुंचे वडिल बिराप्पा वाघमोडे व पांडूरंग कोळेकर यांना पोलीसांनी अटक केली आहे. नवरदेवाचे वडिल हे शासकीय कर्मचारी आहेत. बालविवाह करणे हा कायद्यानुसार गुन्हा असतानाही अद्यापही ग्रामीण भागात याला न जुमानता बालविवाह होत असल्याचे या घटनेवरून उघड झाले आहे.
दोन अल्पवयीन वधुंना सोलापूर येथील बालसुधारगृहात पाठविण्यात आले आहे तर दोन नवरदेवांचा मुक्काम कारागृहात हलविण्यात आला आहे. या घटनेचा अधिक तपास सहाय्यक फौजदार एम.बी.जमादार हे करीत आहेत.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
