टीम मंगळवेढा टाईम्स।
फडणवीस शिंदे सरकार स्थापनेनंतर सगळेच हिंदू सण जल्लोषात साजरे होऊ लागले आहेत अशातच दीपावलीचा सण पृथ्वीवर जल्लोषात साजरा होत आहे. आज मंगळवार दि. 25 ऑक्टोबर रोजी आकाशात सुर्यग्रहण पहायला मिळणार आहे.
विशेष म्हणजे भारतातून हे ग्रहण दिसणार आहे. मंगळवारी संध्याकाळी खंडग्रास सूर्यग्रहण दिसणार आहे. अशी माहिती पंचांगकर्ते, खगोल अभ्यासक दा. कृ.सोमण यांनी दिली.
याविषयी अधिक माहिती देताना सोमण म्हणाले की, २१ ऑक्टो. वसुबारस पासुन दिवाळीला प्रारंभ झाला.
२२ ऑक्टो.ला धनत्रयोदशी आणि सोमवार २४ ऑक्टोबर रोजी नरक चतुर्दशी, अभ्यंगस्नान आणि लक्ष्मी- कुबेरपूजन झाले.
तर अश्विन अमावास्या मंगळवार २५ ऑक्टोबर रोजी खंडग्रास सूर्यग्रहण होणार असून ते भारतासह आशिया खंडाचा पश्चिम व मध्य भाग, संपूर्ण यूरोप आणि आफ्रिका खंडाच्या काही भागातून दिसणार आहे. हे सूर्यग्रहण ग्रहणचक्र (सॅरोस) १२४ क्रमांकाचे आहे.
मुंबईतून पाहिल्यास सायंकाळी ४-४९ वाजता सूर्यग्रहणास प्रारंभ होईल. ग्रहण मध्य सायं. ५-४३ वाजता होईल त्यावेळी चंद्रबिंब सूर्यबिंबाचा ३६ टक्के भाग झाकून टाकील.पश्चिम आकाशात हे सुंदर दृश्य पाहता येईल.
नंतर ग्रहण सुटण्याआधीच सायं. ६-०८ वाजता सूर्यास्त होईल. ग्रहणातच सूर्यास्त होताना दिसेल.
महाराष्ट्रातील पश्चिमेस सागर किंना-यावरून पाहिल्यास सागरात ग्रहणातच सूर्यास्त होताना दिसेल. छायाचित्रकारांसाठी ही एकप्रकारे पर्वणीच आहे. भारतातून वेगवेगळ्या ठिकाणांहून वेगवेगळ्या वेळी हे सूर्यग्रहण दिसेल.
सूर्यग्रहण हे साध्या डोळ्यांनी पाहू नये.दृष्टीस इजा होते. सूर्यग्रहण ग्रहण चष्म्यातूनच पहावे. किंवा चाळणीतून सूर्याची प्रतिमा कागदावर घेऊन त्यामध्ये पहावे.
या सूर्यग्रहणानंतर १४ दिवसांनी मंगळवारी ८ नोव्हेंबर रोजी होणारे चंद्रग्रहणही भारतातून दिसणार आहे. त्यादिवशी ग्रहणातच चंद्र उगवताना दिसणार आहे.
गावाचे नाव ग्रहण प्रारंभ सूर्यास्त
पुणे सायं. ४-५१. सायं. ६-३१
नाशिक सायं. ४-४७ सायं. ६-३१
नागपूर सायं. ४-४९ सायं. ६-२९
कोल्हापूर सायं. ४-५७. सायं. ६-३०
संभाजीनगर सायं. ४-४९ सायं.६-३०
सोलापूर सायं. ४-५६. सायं. ६-३०
दीपावली आणि सूर्यग्रहण
यावर्षी दीपावलीमध्ये जरी सूर्यग्रहण येत असले तरी मंगळवार २५ अॉक्टोबर रोजी सूर्यग्रहणाच्या दिवशी कोणताही सण नाही. मंगळवारी सूर्यग्रहण दिसणार आहे. बुधवार २६ अॉक्टोबर रोजी बलिप्रतिपदा, भाऊबीज एकाच दिवशी आले आहेत. असेही दा. कृ. सोमण यांनी सांगितले.(स्रोत:तरुण भारत मुंबई)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज