समाजाला घडवण्याचे काम शिक्षक करत आहेत : समाधान आवताडे

मंगळवेढा : समाधान फुगारे

मंगळवेढा तालुक्याला मोठी शैक्षणिक गुणवत्ता प्राप्त झाली असून शिक्षक हे समाजाला घडवण्याचे काम करत असल्याचे प्रतिपादन दामाजी कारखान्याचे अध्यक्ष समाधान आवताडे यांनी केले आहे.ते पंचायत समिती शिक्षण विभाग यांनी आयोजित केलेल्या आदर्श शिक्षक पुरस्कार वितरण समारंभाप्रसंगी बोलत होते.

व्यासपीठावर जिल्हा मध्यवर्ती बँकेचे संचालक बबनराव आवताडे,जिल्हा परिषदेचे उपाध्यक्ष दिलीप चव्हाण,सभापती सौ.प्रेरणा मासाळ,गटविकास अधिकारी सौ.सुप्रिया चव्हाण,उपसभापती सुरेश ढोणे,शिवसेनेचे माजी तालुकाप्रमुख प्रा.येताळा भगत,अँड.दत्तात्रय तोडकरी,सुधाकर मासाळ,माजी सभापती प्रदीप खांडेकर, माजी सदस्य संजय पवार,शिक्षक नेते संजय चेलेकर,सुरेश पवार,सुरेश भाकरे, सचिन शिवशरण,हिम्मत पाटील,बिरा कोळेकर आदीजन उपस्थित होते.

जाहिरातीसाठी संपर्क: 7588214814

आवताडे पुढे बोलताना म्हणाले की,शिक्षकांनी समाजातील त्रुटी सोडून त्या दूर करण्यास मदत केली पाहिजे.शिक्षक पुरस्कार हा शैक्षणिक दृष्ट्या न बघता आपण केलेल्या कार्याचे प्रतीक आहे.मंगळवेढा तालुका हा ज्वारीचे कोठार म्हणून जसे प्रसिध्द आहे त्याचबरोबर खेळ,शिक्षण, कला याबाबतीत ही मंगळवेढयाचे नाव जगभरात पोहचले आहे.

आत्तापर्यंत सर्वात जास्त आदर्श शिक्षक पुरस्कार मंगळवेढा तालुक्याला मिळालेले आहेत.गेल्या कित्येक वर्षांपासून आपला तालुका दृलक्षीत होता.उपाध्यक्ष तालुक्याला मिळाल्याने विकास करण्यासाठी मदत होणार असून जास्तीत जास्त निधी खेचून आणण्यासाठी आम्ही कटिबद्ध असल्याचे सांगितले.

शिक्षक हा समाज घडवणारा असून त्यांनी समाज घडवण्याचे काम केले आहे.पुढील पिढी सुसंस्कृत बनवण्यासाठी तो सतत प्रयत्न करत आहे.शिक्षकांच्या पाठीशी खंबीरपणे उभे राहून त्या सर्व अडचणी सोडल्या जातील असे त्यांनी सांगितले.

प्रेरणा मासाळ बोलताना म्हणाल्या की,मंगळवेढा तालुक्यातील सर्व शाळांची गुणवत्ता उल्लेखनीय असून शिक्षकांचा यामध्ये मोठा वाटा आहे.शिक्षकांचे सर्व प्रश्न मार्गी लावण्यासाठी मी प्रयत्न करणार असल्याचे त्यांनी सांगितले.

या कार्यक्रमाचे प्रस्तावित गटशिक्षणाधिकारी पोपटराव लवटे,सूत्रसंचालन दिगंबर तोडकरी यांनी केले तर आभार विस्तार अधिकारी बजरंग पांढरे यांनी मानले.

मंगळवेढा तालुक्यातील २२ शिक्षणांना आदर्श शिक्षक पुरस्कार देण्यात आला.